Almaty oblysynda ortasha jyldamdyq erejesin buzýdyń qansha deregi tirkeldi
QONAEV. KAZINFORM — Bıyl Almaty oblysynyń respýblıkalyq joldarynda ortasha jyldamdyq júıesi engizildi.
2026 jyly aqpan aıynda ortasha jyldamdyqty baqylaý júıesi Úlken Almaty aınalma avtomobıl jolynda engizildi. Keıin bul júıe óńirdiń ózge avtojoldarynda iske qosyldy.
Kazinform agenttigi Almaty oblysynyń polıtsııa departamentine saýal joldap, jyl basynda ornatylǵan jańa kameralar ortasha jyldamdyq erejelerin buzý derekterin qanshalyqty jıi tirkeletinin surady. Departament jaýabyna sáıkes, ortasha jyldamdyq rejımi men ony anyqtaıtyn avtomatty beınebaqylaý kameralary — jol qozǵalysyna qatysýshylardyń tártibin arttyrý, óreskel quqyq buzýshylyqtardyń aldyn alý jáne óńir avtojoldaryndaǵy qaýipsizdikti qamtamasyz etý maqsatynda ornatylǵan.
Jalpy avtomatty júıeler iske qosylǵan sátten bastap qazirge deıin 23 624 jol qozǵalysy erejesin buzý deregi anyqtalǵan.
Onyń ishinde:
— «Almaty-Bishkek» avtojolynda 10 202 quqyq buzýshylyq;
— Úlken Almaty aınalma avtomobıl jolynda 13 422 quqyq buzýshylyq tirkeldi.
— Bul baǵyttaǵy jumystar aldaǵy ýaqytta da jalǵasady. Negizgi maqsat — azamattardyń qaýipsizdigin qamtamasyz etý jáne joldardaǵy aýyr zardaptardyń aldyn alý, — dep atap ótti departamentten.
Eske salaıyq, elimizde kameralar 2024 jyldyń 4 jeltoqsanynan bastap ortasha jyldamdyqty tirkeı bastady.
Byltyr ortasha jyldamdyqty baqylaý júıesin engizgennen keıin jol-kólik oqıǵalary 8%-ǵa azaıǵany habarlandy.
Bıyl taǵy 1,5 myń shaqyrym jolda ortasha jyldamdyqty baqylaý júıesin engizý josparlanyp otyr. Olardyń qatarynda «Qyzylorda — Aral», «Qostanaı — Troıtsk», «Aqtóbe — Orynbor», «Balqash — Býrylbaıtal», Taraz qalasy aınalma joly, «Qostanaı — Denısovka», «Shý — Býrylbaıtal», «Qandyaǵash — Maqat» joldary bar.
