Almaty oblysynda ornalasqan tanymal týrıstik aýylda jer daýy týyndady
QONAEV. KAZINFORM — Almaty oblysy Kólsaı kólderiniń eteginde ornalasqan Saty aýylynda jerge qatysty daý shyqty. Jergilikti turǵyndar aýyldyń burynǵy basshylyǵyn jer telimderin zańsyz satqan dep aıyptap otyr.
Bul týraly aýyl turǵyndary Kegen aýdanynyń ákimi Nurbaqyt Teńizbaevpen jáne quqyq qorǵaý organdarynyń ókilderimen kezdesý barysynda málim etti. Osy aýylda 40 jyldan beri turyp kele jatqan Erbolsyn Ahmetov óz oqıǵasyn aıtty.
— Ata-anam bul jerde ómir boıy egin egip, kartop, oramjapyraq, sábiz ósirdi. Salyq tólep, osy jerde eńbek etti. 2016–2018 jyldary úı salǵymyz keldi, biraq sol kezdegi aýyl ákimi Álibek Ybraev bul jer telimi jaıylym úshin arnalǵan dep, qurylysqa ruqsat bermedi. Ol ákemniń memlekettik aktisin «tekseremin» dep alyp ketti. Keıin bizge bul 50 sotyq jerdiń bólinip, basqa adamdarǵa satylǵany belgili boldy. Budan bólek, aýyldyń basqa jaǵyndaǵy sharýa qojalyǵy úshin bólingen jerimiz de osyndaı taǵdyrdy bastan keshti, - dedi Erbolsyn Ahmetov.
Ol sondaı-aq 20 jyldan beri jer alý kezeginde turǵanyn, biraq áli kúnge deıin ony ala almaǵanyn aıtty. Dál osyndaı jaǵdaıǵa basqa aýyl turǵyndary da tap bolǵan.
Aýdan prokýrorynyń ókili azamattardy óz talap-aryzdaryn zańǵa sáıkes resmı túrde tapsyrýǵa shaqyrdy — barlyq mán-jaı boıynsha quqyqtyq tekseris júrgiziledi.
Aýdan ákimi Nurbaqyt Teńizbaev óz kezeginde bul jer telimderiniń 9–10 jyl buryn satylǵanyn, olardyń zańdylyǵyn prokýratýra tekseretinin jetkizdi.
Ol ózi ákim bolyp taǵaıyndalǵan ýaqyttan beri Saty aýylynda birde-bir jer telimi bólinbegenin atap ótti.
— 10 jyl buryn eshkim Satynyń týrıstik aımaqqa aınalatynyn bilgen joq. Ol kezde jurt jerin tastap, aýyldan ketip jatty. Qazir mundaǵy 1 sotyq jerdiń baǵasy 1–1,5 mıllıon teńgege jetti. Sondyqtan jerge degen qyzyǵýshylyqtyń artqany túsinikti, — dedi Nurbaqyt Teńizbaev.
Sonymen qatar ol jergilikti turǵyndardyń «jer ınvestorlarǵa berilip jatyr» degen shaǵymyna jaýap berdi.
— Zań bárine ortaq. Ákimdik eshqandaı ınvestorǵa jer satpaıdy. Olar jerdi jergilikti turǵyndardan ózderi satyp alyp jatyr. Árıne, zamanaýı qonaqúıler, dámhanalar, týrıstik aımaqtardyń salynýy — jaqsy. Ol jumys oryndaryn ashyp, aýyl ekonomıkasyn jandandyrady. Biraq qaıtalap aıtamyn, bul nysandar turǵyndar óz erkimen satqan jer telimderinde salynyp jatyr. Eger ózderi satsa, bul — olardyń quqyǵy, - dedi aýdan basshysy.
Ákimdiktiń málimetinshe, qazir Saty aýylynda 100-den astam týrıstik bıznes nysan tirkelgen, barlyǵy jeke ınvestıtsııa esebinen salynǵan.
Aýyl ákimi Nurym Saǵymjannyń sózinshe, 2018 jyldan beri Satyda jerdiń baǵasy aıtarlyqtaı ósken. Onyń aıtýynsha, bul óńirge tek Qazaqstannyń túkpir-túkpirinen emes, shetelden de ınvestorlar qyzyǵýshylyq tanytyp otyr.
— Biz jergilikti turǵyndarǵa túsindirý jumystaryn júrgizip kelemiz. Kóbi jyldar boıy kezekte turyp, qazir nege jer ala almaıtynyn suraıdy. Basym bóliginiń jeri bolǵan, ony ózderi satyp jibergen, - dedi ol.
Aýdan ákimi qazir Saty aýylynda bos jer telimderi joq ekenin málimdedi. Eger 2007 jyly jer alý kezeginde 180 adam bolsa, qazir 1800-ge jetken. Degenmen jańa ýchaskeler ázirge berilmeıdi.
Aýdan basshysynyń aıtýynsha, bıyl aýyldyń jańa bas jospary bekitiledi. Oǵan sáıkes aýyl aýmaǵy 980 gektarǵa keńeıedi. Osydan keıin jer telimderi tek resmı túrde kezekte turǵan, zańdy quqyǵy bar azamattarǵa ǵana berilmek.
Eske salaıyq, 2023 jyly Almaty oblysynyń Saty aýyly halyqaralyq deńgeıde eń úzdik týrıstik aýyl retinde tanylyp, bedeldi «Best Tourism Villages by UNWTO» syılyǵymen marapattaldy.
Osyǵan deıin óńirde týrısterdiń qaýipsizdigin kúsheıtý maqsatynda qandaı jobalar qolǵa alynǵany týraly jazǵan edik.