Almaty oblysynda Ońtústik Koreıanyń kıno kompanııasy telehıkaıa túsirip jatyr

Álemdik deńgeıdegi serıal Uıǵyr aýdanyndaǵy Dardamty aýylynda, Aıly jáne Qara shatqaldardyń aýmaǵynda (Lýnnyı kanon, Chernyı kanon), Qonaev qalasyndaǵy Іle ózeniniń jaǵalaýynda túsiriledi. Almaty oblysynyń ákimi Marat Sultanǵazıev túsirilim alańyna arnaıy baryp, jobanyń iske asyrylý barysymen tanysty.

Aımaq basshysy shyǵarmashylyq toppen, tehnıkalyq qurammen jáne jobaǵa tartylǵan jergilikti turǵyndarmen kezdesti.

— Qazirgi tańda Qarasaı jáne Uıǵyr aýdanynda halyqaralyq deńgeıdegi fılmder túsirilip jatyr. Bul jobalar kreatıvti ekonomıkany damytýǵa zor yqpal etedi. Ońtústik Koreıa kompanııasynyń fılmderin álem jurtshylyǵy qyzyǵyp tamashalaıdy. Al bul kıno kórsetilimge shyqqannan keıin sheteldikter Qazaqstannyń ásem tabıǵatyn kórip, elimizge aǵyla bastaıdy. Soǵan sáıkes, óńirge keletin týrıster sany da artady. Osylaısha, Qazaqstannyń, onyń ishinde Almaty oblysynyń tanymaldyǵy artyp, álem nazaryn ózine aýdartady, — dedi Marat Eleýsizuly.

Túsirilim alańynda akterler, kaskaderler, tehnıkalyq qyzmetkerler jáne jergilikti merdiger uıymdar jumys istep jatyr. Jobany daıyndaý jáne júzege asyrý barysynda Almaty oblysyndaǵy qonaqúıler, qoǵamdyq tamaqtaný oryndary, kólik qyzmetteri paıdalanylýda. Túsirilim jumystaryna jergilikti turǵyndar da tartylǵan.

Shyǵarmashylyq top ókilderiniń aıtýynsha, telehıkaıany túsirý úshin Qazaqstannyń tańdalýy beker emes. Sebebi elimizdiń tabıǵı landshafttary alýan túrli, kórkem túsirilim jasaýǵa óte qolaıly jáne halyqaralyq kınoóndiristi damytýǵa úlken múmkindigi bar.

Jobanyń bas prodıýseri — Rýslan Pak. Serıaldyń kórsetilimi 2027 jylǵa josparlanǵan. Mundaı jobalardy júzege asyrý halyqaralyq yntymaqtastyqty nyǵaıtýǵa, kreatıvti ındýstrııany damytýǵa, sondaı-aq Almaty oblysynyń ınvestıtsııalyq jáne týrıstik ımıdjin qalyptastyrýǵa yqpal etedi.