Almaty oblysynda óndiristi damytý jáne ımportty almastyrý máselesi talqylandy
QONAEV. KAZINFORM — Depýtat Aıdarbek Qojanazarov Almaty oblysynyń kásipkerlerimen ımportty almastyrýdy damytý taqyrybyn kóterdi, dep habarlaıdy Májilistiń baspasóz qyzmeti.
Almaty oblysynda «Respublica» partııasynyń tóraǵasy, Májilis depýtaty Aıdarbek Qojanazarov birqatar óndiristik nysandy aralap, kásipkerlermen ekonomıkany damytý, jumys oryndaryn qurý jáne óńirlik klasterdi qoldaý boıynsha memleket júrgizip jatqan saıasatty talqylady.
Aldymen depýtat Alataý qalasyndaǵy «PENOPLEX (PENOPLEKS) QR» JShS-na at basyn tirep, jylý saqtaǵysh qurylys materıaldaryn shyǵaratyn zaýyttyń jumysymen tanysty. Kásiporyn ónimdi turǵyn qurylysy úı naryǵyna, kommertsııalyq jáne ınfraqurylym nysandaryn salýshy kompanııalarǵa jetkizedi, sol arqyly ımportty almastyrýǵa, ónerkásip óndirisin qalyptastyrýǵa úles qosyp keledi.
Kásipkerlermen áńgime barysynda ádil salyq, memlekettik jáne korporatıvtik satyp alý kezinde otandyq qurylys materıaldaryn ilgeriletý, jetkizý tizbegindegi qazaqstandyq úlesti ulǵaıtý jáne jergilikti óndirýshilerdiń taýar belgilerin qorǵaý máseleleri kóterildi.
Sondaı-aq Aıdarbek Qojanazarov temirbeton shpal men qurylys materıalyn shyǵaratyn kásiporynǵa, sýsyn shyǵaratyn zaýytqa bardy.
— Óńirlerde atqarylyp jatqan jumystar Prezıdent Qasym-Jomart Toqaev alǵa qoıǵan basymdyqtarǵa tolyq sáıkes keledi. Memleket basshysy naqty sektordy qoldaý, shıkizattyq emes ındýstrııan damytý jáne ornyqty ekonomıkalyq ósýdi qalyptastyrý qajettigin birneshe ret atap ótti. Byltyrǵy Joldaýynda Alataý qalasyna Úkimetke tikeleı baǵynatyn arnaıy mártebe berý qajettigin aıtty. Bul artyqshylyq emes, bul — osy jobany júzege asyrýǵa jáne ınvestıtsııa tartýǵa yqpal etetin qural. Alataý óńirdegi alǵashqy tolyqqandy tsıfrlyq qalaǵa aınalyp, tehnologııalyq progrestiń jáne ómir men jumysqa qolaıly ortanyń sımvoly bolýǵa tıis, — dep atap ótti depýtat.
Sapar qorytyndysy boıynsha «Respublica» parlamenttik fraktsııasynyń depýtattary salalyq vedomstvolarmen birlesip halyqtyń jáne kásipkerlerdiń suranystary boıynsha jumysty jalǵastyrady.
Buǵan deıin habarlanǵandaı, Májilis depýtattary Atyraýda shekara qaýipsizdigi máselesin kóterdi.