Almaty oblysynda oqýshylar boıaý ıisinen ýlanyp qaldy: Ákimdik túsinik berdi

QONAEV. KAZINFORM — Almaty oblysy Talǵar aýdanynyń ákimdigi aýyl mektepteriniń birinde sabaq ýaqytynda ýlanǵan bes bala týraly aqparatty joqqa shyǵardy.

Áleýmettik jelide Talǵar aýdanyndaǵy mektepterdiń birinde oqý jyly aıaqtalmaı jatyp, kabınetterdiń syrlanǵany týraly jáne boıaý ıisinen 5 oqýshy ýlanyp, aýrýhanaǵa túskeni jaıynda aqparat paıda boldy. 

Talǵar aýdandyq bilim bólimi 16 sáýir kúni saǵat 16:20–da ekinshi sabaqta 7-synyp oqýshysy densaýlyǵyna shaǵymdanǵanyn habarlady. Dárigerlik ambýlatorııa dárigerleri alǵashqy medıtsınalyq kómek kórsetip, oqýshyny anasymen birge ony Іle aýdany, Ótegen batyr aýylyndaǵy oblystyq balalar aýrýhanasyna jiberdi.

«Dárigerler oqýshyny tekserip, analızder alyp, JRVI dıagnozyn qoıdy. Oqýshynyń ýlanǵany rastalmady. Bul rette boıaý ıisinen zardap shekken bes bala týraly aqparatta shyndyqqa janaspaıdy», — dep atap ótti ákimdiktegiler.

Ákimdikten 12 sáýir kúni Jalǵamys aýylyndaǵy № 15 mektepte sabaq bitkennen keıin bir synyptyń qabyrǵasy, edeni men partalary, sondaı-aq qabyldaý bólmesi men dırektor kabınetiniń edenderi syrlanǵanyn atap ótti. Mektep kabınetterin syrlaý demeýshilik qarajat esebinen júrgizildi.

«Mektepke jyl saıynǵy aǵymdaǵy jóndeý jumystary oqý jyly aıaqtalǵannan keıin júrgiziledi. Osy talapty oryndamaǵan mektep dırektoryna „sógis“ túrindegi tártiptik jaza qoldanyldy. Bul másele bilim basqarmasynyń qatań baqylaýynda», — dep tolyqtyrdy vedomstvodan.