Almaty oblysynda oqýshy belgisiz jaǵdaıda ýlanyp qaldy - polıtsııa is qozǵady

QONAEV. KAZINFORM – Almaty oblysynyń polıtsııasy ózin-ózi óltirýge deıin jetkizý baby boıynsha is qozǵady.

Áleýmettik jelide Qonaevta oqýshy balanyń qatarlastarynan taıaq jep, jan saqtaý bólimine túskeni týraly málimet tarady. 

Alaıda Almaty oblysynyń Bilim basqarmasy bul málimetti rastaǵan joq. Basqarma aqparatyna sáıkes, 31 qańtar kúni kámeletke tolmaǵan A. esimdi oqýshy Qonaev qalasy kópsalaly aýrýhanasynyń jan saqtaý bólimine «Hımııalyq antıseptıkpen ulaný» dıagnozymen túsken.

- Qonaev qalasynyń Polıtsııa basqarmasynda is tirkelip, búgingi kúni tergeý amaldary júrgizilip jatyr. Qazirgi kezde jasóspirim tolyq esin jıyp, aýrýhanada em qabyldaýda, jaǵdaıy qalypty, - dep habarlady Bilim basqarmasynan.

Al óńirdiń Polıtsııa departamenti QR QK 105 baby boıynsha is qozǵalǵanyn málimdedi.

- Polıtsııada ózin-ózi óltirýge deıin jetkizý deregi boıynsha qylmystyq is qozǵalǵanyn habarlaımyz. Qazirgi ýaqytta bolǵan oqıǵanyń barlyq mán-jaıyn tolyq jáne jan-jaqty zertteý úshin barlyq qajetti tergeý áreketteri júrgizilip jatyr. Atalǵan jumystardyń nátıjesi boıynsha túpkilikti protsestik sheshim qabyldanatyn bolady. Ózge aqparat tergeý múddesine oraı jarııa etilmeıdi, - dep habarlady polıtsııadan.

Eske salaıyq, buǵan deıin Almatydaǵy muz aıdynynda jasóspirim qyzdy qatarlastary uryp tastaǵanyn jazǵanbyz.