Almaty oblysynda ne ózgeredi: baspana qurylysy, úsh aýysymdaǵy mektep, Qonaev qalasyn damytý

ASTANA. KAZINFORM – Almaty oblysynyń ákimi Marat Sultanǵazıev «Jibek Joly» telearnasynyń «Ýáde» baǵdarlamasyna suhbat berip, Prezıdent tapsyrmalarynyń oryndalýy, turǵyn úı qurylysy, úsh aýysymdy mektep problemasy jáne basqa da mańyzdy máselelerge qatysty pikirin aıtty.

Baspana kezeginde turǵandar kóbeıdi

- Bıyl kezekte turǵan adamdarǵa arnalǵan turǵyn úı qurylysy men olarǵa baspana satyp alý jumystary ilgeriledi. Osy jyly 1 myńnan astam páter beriledi, ıaǵnı onyń jartysy tapsyryldy. Qalǵanyn jańa jylǵa deıin satyp alyp, kezektegi otbasylarǵa beremiz. Jyl saıyn oblysta turǵyndar sany artyp keledi. Sondyqtan kezekte turǵandardyń da sany ósip otyr. Qazir kezekte turǵandar 41 myńǵa jetti. Adam sanyna toqtalsaq, byltyr 15 myńǵa jýyq bala mektep bitirse, bıyl 36 myń búldirshin 1-synypqa bardy, - dedi M. Sultanǵazıev.

Onyń aıtýynsha, 2025 jyly osy sanattaǵy 2 myńǵa jýyq adam baspanaly bolady, ıaǵnı bıylǵa qaraǵanda eki ese artady.

- Kóbisi Almatynyń tóńireginde kezekke turǵysy keledi. Bul rette kezekke turǵandardyń basym bóligi osy aýmaqta. Al shalǵaı aýdandarda kezekte turǵandardyń sany azdaý jáne ol jaqtarda múmkindik te kóbirek. Óıtkeni turǵyn úı baǵasy arzandaý, qurylys quny da joǵary emes. Sonymen qatar osy aýdandarda mektep, balabaqsha, mádenıet nysandaryna qatysty máseleler sheshilgen. Almatynyń tóńireginde bul másele kúrdeli, - dedi ákim.

Qonaev qalasyndaǵy qurylys

Marat Sultanǵazıev qazir Qonaev qalasynda qurylys nysandary salynyp jatqanyn, ony kásipkerler ınvestorlardyń esebinen júzege asyryp otyrǵanyn aıtty. Bul turǵyda kóbine turǵyn úıler salynady.

Onyń sózine qaraǵanda, 2023 jyldyń aıaǵynda Qonaevta áleýmettik jáne ákimshilik nysandardy salý boıynsha keshendi jospar bekitilgen. Bıyl tolyq jobalaý jumystary atqaryldy.

- 9 jobaǵa qatysty saraptamanyń oń qorytyndysyn aldyq. Úlken nysandar bolǵandyqtan, osy jumystarǵa tıisti ýaqyt kerek boldy. Kóktemde bıýdjet bólindi, sodan keıin jobalaý jumystary bastalǵan edi. Bul áleýmettik nysandarǵa qarajat jergilikti bıýdjetten qarastyrylady. Máselen, iri jobalardyń qatarynda teatr, Kongress holl, stadıon sııaqty nysandar bar. Bıznes tarapynan osy jyly eki úlken mektep salyndy jáne olardyń quny 6 mlrd teńgeden astam. Munymen qosa, kásipkerler jaǵalaýdy abattandyrýǵa qatysty, - dedi óńir ákimi.

Qalada ákimshilik nysandardyń birazyn ákimdik satyp alsa, keıbiri jalǵa alynyp otyr.

- Búginde Qonaev qalasynyń bıýdjeti 4 ese artty. Halyq sany 20 paıyzdan astam ósti. Qazir tozǵan ınfraqurylym tolyq jańartylyp jatyr, onyń ishinde káriz jáne sý júıesi, joldar, turǵyn úılerdiń shatyrlary jóndeledi. Qaladaǵy tartymdy jerlerdiń biri – jaǵalaý. Sondyqtan osy aýmaqta da tıisti jumystar atqarylyp otyr, - dedi oblys basshysy.

Eske salsaq, Ǵylym jáne joǵary bilim mınıstrligi Almaty oblysynda Qonaev akademııalyq qalashyǵy salynatynyn málimdedi. 

Bul rette M. Sultanǵazıev osy maqsatqa jer telimi bólingenin atap ótti. Endi qurylys boıynsha jobalaý jumystary bastalady.

- Ol jerge ǵımarat salýmen qatar, jobalaý jumystary men ınfraqurylym tartýdy júzege asyrý kerek. Osy baǵytta bizdiń jaýapkershilik - jer telimin bólip, ınfraqurylymdy qamtamasyz etý, - dedi ákim.

Úsh aýysymdaǵy mektepter

Suhbat kezinde 2023 jyly Almaty oblysynda úsh aýysymdaǵy 44 mektep bolǵany aıtyldy. Qazirgi kezde osyndaı 37 mektep bar eken.

- Osy máseleni sheshý úshin 26 mekteptiń qurylysy bastaldy. Kásipkerler esebinen salynǵan mektepter bar. Osyny eskere otyryp, úsh aýysymdaǵy mektepter sanyn 37-ge túsirdik. Bul turǵyda jańa mektepterdi salýdy jalǵastyrý kerek, óıtkeni bala sany artyp jatyr. Taǵy 5 mektepti jyldyń aıaǵyna deıin tapsyramyz. Jalpy, 26 mektepti salýdy bastasaq, sonyń 10-y bıyl bitedi, 16-sy kelesi jyly aıaqtalady. Biraq úsh aýysymdy tolyq joıý úshin taǵy 27 mektep salýymyz qajet. Bul 27 mektep memlekettik jobalardyń ishine nemese «Jaıly mektepke» enbedi. Degenmen, jer telimderin daıarlap qoıdyq. Onyń qurylysyna kásipkerlerdi tartýdy josparlap otyrmyz. Atap aıtqanda, úsh aýysymdy mektepter máselesin sheshý bizdiń basym baǵyttardyń biri. Jalpy, osy baǵyttaǵy qarqyn jaman emes, - dedi Marat Sultanǵazıev.

Qarasaı aýdanyndaǵy «Asyl arman» turǵyn úı kesheni mańynan salynyp jatqan jańa mektep 2025 jyldyń qyrkúıeginde paıdalanýǵa berilmek.

Talǵardaǵy qaıǵyly jaǵdaı

Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz. 

Ashýly talǵarlyqtar jasóspirim ólimine baılanysty narazylyqqa shyqty. 

12 qazan túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

9 jeltoqsanda Talǵar mańynda Sherzat Polattyń aǵasy óli tabyldy. 

Buǵan deıin Azat aýylynda jerleý rásimin ótkizý kezinde qoǵamdyq tártipti buzǵany úshin Sherzat Polattyń ákesi ustalǵanyn jazǵanbyz.

«Ýáde» baǵdarlamasyna suhbaty barysynda Almaty oblysynyń ákimi Talǵardaǵy saıası ári qoǵamdyq jaǵdaı turaqty ekenin aıtty.

- Ol jerde jantúrshigerlik oqıǵa boldy. Osy taqyryp áleýmettik jelilerde de biraz talqylanyp jatyr. Eń bastysy, halyqqa ýaqytyly ári naqty málimet berý kerek. Sol sebepti qazir quqyq qorǵaý organdary ashyq túrde jumys atqaryp jatyr. Barlyq málimetti zań talaptaryna sáıkes qoǵamǵa jetkizip otyr, - dedi M. Sultanǵazıev.

Onyń sózine qaraǵanda, atalǵan otbasyny ákimdik baspanamen qamtamasyz etýge daıyn.