Almaty oblysynda muǵalim men onyń ákesi soqqyǵa jyǵyldy

QONAEV. KAZINFORM – Almaty oblysy, Qarasaı aýdanynda muǵalimge burynǵy kúıeýi shabýyl jasap, judyryqtaǵan. Jábirlenýshi bir jyl buryn kúıeýimen zańdy túrde ajyrasqan.

Bul týraly Májilis depýtaty Irına Smırnova áleýmettik jelidegi paraqshasynda jazdy. 

Onyń sózinshe, eks-áriptesiniń burynǵy kúıeýi úıdiń qaqpasyn syndyryp, esikti kúshpen ashyp kirgen. Ol ınsýlt alǵan naýqas ákesin tórt saǵat boıy baılap, qorlap, keıin úıge kelgen burynǵy jubaıy men onymen birge erip kelgen tanysyna shabýyl jasaǵan.

– Áıeldiń ishi men keýdesine birneshe jaraqat salynǵan, ákesi qatty soqqyǵa jyǵylǵan, al úıde bolǵan úshinshi adam bas súıek-mı jaraqatyn aldy. Bul – onyń alǵashqy shabýyly emes. Buǵan deıin de ol úıge urlanyp kirip, dúnıelerin qıratyp, kólikke zaqym keltirgen, burynǵy áıelin qorqytý maqsatynda túrli áreketterge barǵan. Jábirlenýshi birneshe márte polıtsııaǵa aryz túsirip, qorǵaýdy suraǵanymen, esh nátıje bolmaǵan, – dep jazdy Irına Smırnova.

Osy jaǵdaıǵa qatysty Almaty oblystyq Polıtsııa departamentiniń baspasóz qyzmeti kúdiktige qatysty is qozǵalǵanyn málimdedi.

– 17 qańtar túngi saǵat 00:25-te Qarasaı aýdanynyń polıtsııasyna Shamalǵan aýylynyń 67 jastaǵy turǵyny burynǵy kúıeý balasy týyndaǵan janjal kezinde oǵan jáne onyń qyzyna dene jaraqatyn salǵany týraly aryz túsirdi. Bul fakt aýdandyq polıtsııada tirkeldi. Jedel-izdestirý is-sharalary barysynda 57 jastaǵy er adam ustaldy, – dep habarlady polıtsııadan.

Vedomstvodan atap ótkendeı, qazir barlyq qajetti tergeý áreketteri júrgizilip jatyr.

Olardyń nátıjeleri boıynsha oqıǵaǵa quqyqtyq baǵa beriledi. Ózge aqparat QR QPK-niń 201-babyna saı jarııa etýge jatpaıdy.

13 qańtar kúni Aqtóbe qalasynda belgisiz bireý qyzdy jáne onyń ata-anasyn kepilge alǵanyn habarlaǵan edik. 

Keıin kepilge alynǵan úıden eki adam qaıtys boldy.