Almaty oblysynda mıllıonnan astam aǵash otyrǵyzylmaı qalǵan
ASTANA. KAZINFORM — Almaty oblysynda jasyl jelekterdi kesýge ruqsat alǵandar ótem retinde otyrǵyzýǵa tıis bolǵan mıllıonnan astam aǵashty tolyq kólemde ekpegen. Bul zań buzýshylyqty oblystyń Mamandandyrylǵan tabıǵatty qorǵaý prokýratýrasy anyqtady.
«Taza Qazaqstan» respýblıkalyq ekologııalyq aktsııasy aıasynda prokýratýra aǵashtardy ótemdik otyrǵyzý talaptarynyń oryndalýyna taldaý júrgizgen. Nátıjesinde jasyl jelekterdi kesýge ruqsat berý kezinde belgilengen mindettemelerdiń tolyq oryndalmaǵany belgili boldy.
Keıingi jyldary ýákiletti organdar 100 myńnan astam aǵashty kesýge 307 ruqsat bergen.
Eń kóp zań buzýshylyq Eńbekshiqazaq aýdanynda anyqtalǵan. Onda 120 ruqsat negizinde 63 myńnan astam aǵash kesilgen. Alaıda onyń ornyna tıisti kólemde jańa kóshet otyrǵyzylmaǵan.
— Taldaý qorytyndysy boıynsha prokýrorlyq qadaǵalaý aktisi engizildi. Qabyldanǵan sharalardyń nátıjesinde qazirdiń ózinde 150 myńǵa jýyq aǵash otyrǵyzylǵan, al 11 laýazymdy tulǵa tártiptik jaýapkershilikke tartylǵan, — delingen habarlamada.
Sonymen qatar oblystyń jasyl qoryn tolyq túgendeý jáne kógaldandyrý jumystaryn ǵylymı súıemeldeý máselelerin pysyqtaý bastaldy.
Bul másele oblys prokýratýrasynyń baqylaýynda.
Eske salaıyq, buǵan deıin Almaty botanıkalyq baǵynda 72 jyl boıy ósip turǵan aǵash kesilgenin habarlaǵanbyz.
