Almaty oblysynda bir mıllıon sharshy metrge jýyq baspana salynǵan

QONAEV. KAZINFORM — Almaty oblysynda áleýmettik osal sanatqa jatatyn eki myńnan astam otbasy baspanaly boldy. Óńir ákimi Marat Sultanǵazıev qurylys sektory turaqty ósim kórsetip, baspanamen qamtý kórsetkishi jyldan-jylǵa artyp kele jatqanyn aıtty.

Ákimniń aıtýynsha, bıylǵy 10 aıda oblystaǵy qurylys kólemi 21% ósip, 948 myń sharshy metr turǵyn úı paıdalanýǵa berilgen.

— Ásirese áleýmettik osal toptardy baspanamen qamtýǵa erekshe nazar aýdarylǵan. Byltyr 1 281 otbasy baspanamen qamtylsa, bıyl 2 236 áleýmettik osal toptaǵy otbasyna úı beriledi. Keıingi 30 jylda memleket tarapynan eshqandaı úı salynbaǵan shalǵaı aýdandarda, onyń ishinde Narynqol, Qaınar, Kegen, Úlken Aqsý, Baqanas aýyldarynda memlekettik baǵdarlama aıasynda jańa úıler salynyp, satyp alynyp jatyr, — dedi Marat Sultanǵazıev Ortalyq kommmýnıkatsııalar qyzmetinde ótken brıfıngide.

Sonymen birge, memlekettik qyzmetkerler, bıýdjettik uıymdar men sport salasy ókilderine arnalǵan «Alataý» óńirlik ıpotekalyq baǵdarlamasyna 3,1 mlrd teńge qarastyrylyp, 120-dan astam azamat baspanamen qamtylmaq.

Buǵan deıin oblys ákimi óńirdegi úsh aýysymdy mektepter máselesi qalaı sheshilip jatqanyn túsindirgen edi.

Oǵan qosa, Almaty oblysynda Nıý-Iork kınoakademııasy fılıaly men «Atletıko Madrıd» fýtbol akademııasy ashyldy.