Almaty oblysynda mıllıardtar bólingen Mádenıet úıiniń qurylysy toqtap tur
QONAEV. KAZІNFORM – Májilis depýtattary Almaty oblysyndaǵy Mádenıet úıiniń qurylysyn synǵa aldy.
«AMANAT» partııasy Almaty oblystyq fılıalynyń baspasóz qyzmeti málim etkendeı, qurylysty aıaqtaýǵa 800 mln teńgeden astam qarjy jetpeıdi.
Ótegen batyr aýylyndaǵy 400 oryndyq Mádenıet úıiniń qurylysy birneshe jylǵa sozylyp keledi. 2022 jyly bastalǵan joba 2023 jyldyń maýsym aıynda paıdalanýǵa berilýi tıis edi. Alaıda jumys tek jartylaı ǵana aıaqtalǵan. Jobaǵa jaýapty taraptardyń áreketi men qarjynyń durys ıgerilmeýi Májilis depýtattarynyń nazaryn aýdardy.
«AMANAT» fraktsııasynyń músheleri Janarbek Áshimjanov, Maksım Rojın jáne Maqsat Tolyqbaı Іle aýdanyna arnaıy kelip, nysannyń qurylys barysymen tanysty. Olar jergilikti bılik pen merdiger kompanııa ókilderimen kezdesip, jumys barysy men qarjylandyrýdyń máselelerin talqylady.
Májilis depýtaty Maksım Rojınniń aıtýynsha, joba bastapqyda durys jasalmaǵan. Kireberis bóligi qate josparlanyp, jer máselesi boıynsha da daý týyndaǵan. Qurylysqa qajetti qarajat ýaqytynda bólinbeı, merdiger óz qarajatymen jumysty jalǵastyrǵan. Nátıjesinde, qurylys qymbattap ketken.
– Bul – óńirdiń áleýmettik damýy úshin óte mańyzdy joba. Nysannyń quny 2,2 mlrd teńge dep bekitilgen. Ǵımarattyń jalpy aýmaǵy – 5 588 sharshy metr. Qarjy kezeń-kezeńimen bólinip keledi. Degenmen jumys tıisti deńgeıde oryndalmaǵan. 2023 jyly paıdalanýǵa berilýi kerek edi, biraq tek 50-55%-y ǵana daıyn. Qurylys toqtap tur. Bul jerde baqylaýdyń jetkiliksizdigi anyq baıqalady. Halyqqa ýáde berilgen bolsa, ony oryndaý – bizdiń ortaq mindetimiz. Biz bul máseleni qatań baqylaýǵa alamyz jáne barlyq jaýapty taraptan naqty áreket talap etemiz, – deıdi depýtat.
Al Іle aýdandyq qurylys bóliminiń basshysy Aıdos Kúnesbaıdyń málimetinshe, 2022 jyly 150,1 mln teńge, 2023 jyly 857,6 mln teńge bólingen.
– 2024 jyly 225 mln teńge bólindi. Qosymsha shyǵyndarǵa baılanysty 2023 jyldyń maýsym aıynda taǵy 404 mln teńge bólingen bolatyn. Soǵan qaramastan, qurylys belgilengen merzimde aıaqtalmady. Ótken jyldyń sáýirinde merzimdi taǵy uzartý týraly kelisim jasalyp, jobanyń aıaqtalý ýaqyty 2025 jyldyń shildesine shegerildi. Qurylysqa jaýapty merdiger – «AK Construction Company» JShS. Qazirgi tańda qurylysty tolyq aıaqtaý úshin qosymsha 805 mln teńge qajet, – deıdi aýdandyq qurylys bóliminiń basshysy Aıdos Kúnesbaı.
Aıtýynsha, qarjylandyrýdyń jetkiliksizdigimen qatar, baqylaýdyń álsizdigi de qurylystyń toqtap qalýyna sebep boldy.
– Basqa óńirlerde mundaı nysandardy 9 aıdyń ishinde salyp bitiredi. Al bul jerde qurylys birneshe jylǵa sozylyp otyr. Bul – jergilikti bıliktiń talapshyldyǵynyń joqtyǵyn kórsetedi. Merdiger kompanııa men tapsyrys berýshi taraptar máseleni jyldam sheshýi kerek. Biz bul máselege kóz jumbaımyz. Maýsym aıynda qurylys aıaqtaldy ma, joq pa, qaıta kelip tekseremiz. Eger jumys bitpese, qosymsha sharalar qabyldaımyz, – deıdi Maksım Rojın.
Qazir qurylysqa qajetti qarjyny bólý máselesi Almaty oblysynyń bıýdjet komıssııasyna joldanbaqshy. Biraq qarjynyń naqty qashan bólinetini jáne nysannyń qashan aıaqtalatyny belgisiz. Depýtattar bul máseleni qatań baqylaýǵa alatynyn málimdedi.
Aıta ketý kerek, «AMANAT» partııasynyń «Halyqpen birge» saılaýaldy baǵdarlamasy aıasynda 2027 jylǵa deıin oblysta 25 Mádenıet úıiniń qurylysy men 27 mádenı nysannyń sapaly kúrdeli jóndeý jumystary josparlanǵan.
Bıyl 9 Mádenıet úıiniń qurylysy men 6 mádenıet úıine kúrdeli jóndeý jumystary júrgizilip jatyr.
Osyǵan deıin Qonaevta Jańa jyldyq bezendirýge baılanysty aýdıt júrgiziletini týraly jazǵan edik.