Almaty oblysynda merzimi ótken 21 myń gaz ballony paıdalanylǵan - TJD eskertý jasady

QONAEV. KAZINFORM – Almaty oblysynyń Tótenshe jaǵdaılar departamenti jeke sektor turǵyndaryna órt qaýipsizdik erejelerin saqtaýǵa shaqyrdy.

TJD Memlekettik órt baqylaý basqarmasy bastyǵynyń orynbasary Aleksandr Parhomenko jylytý maýsymy bastalǵanda órt jáne gazben baılanysty oqıǵalar sany artatyn aıtyp, bul kezeńde qaýipsizdik sharalaryn erekshe saqtaý mańyzdy ekenin atap ótti. Onyń aıtýynsha, jyl basynan beri oblysta 613 órt tirkelse, onyń 379-y turǵyn úı sektorynda bolǵan. Oqıǵalar saldarynan 14 adam qaza tapty.

– Jylytý maýsymynda negizgi qaýipter qatarynda peshterdi durys paıdalanbaý máselesi tur. Peshterdi qaraýsyz qaldyrýǵa, balalarǵa senip tapsyrýǵa, sondaı-aq tutatqysh retinde janǵysh suıyqtyqtardy qoldanýǵa bolmaıdy, - dedi ol. 

Sonymen qatar mamandar gazben baılanysty jaǵdaılarǵa da nazar aýdarǵan jón ekenin eskertti. Bıyl oblysta 7 gaz-aýa qospasynyń jarylysy tirkelip, nátıjesinde 5 adam jaraqat alǵan jáne 1 adam qaza tapty. Mundaı jaǵdaılar qys mezgilinde gaz jabdyqtaryn durys paıdalanbaý saldarynan týyndaýy múmkin. 

– Oblys aýmaǵynda merzimi ótken 21 myńǵa jýyq gaz ballondary áli de paıdalanylyp júr. Bul másele, ásirese, aýyldyq jerlerde ózekti, sebebi bul aýdandarda áleýmettik jaǵdaıy tómen turǵyndar jıi kezdesedi, - dedi Almaty oblysynyń ónerkásiptik qaýipsizdik komıteti departamenti basshysynyń orynbasary Qanat Esbolǵanov. 

Tótenshe jaǵdaılar departamenti mamandary órttiń aldyn alý jáne turǵyndardyń qaýipsizdigin qamtamasyz etý úshin qarapaıym erejelerdi saqtaýǵa shaqyrdy.

Eske salaıyq, Almaty oblysyndaǵy turǵyn úıde gaz jarylyp, 1 adam mert bolǵanyn jazǵanbyz.