Almaty oblysynda memleketaralyq izdeýde júrgen tórt sheteldik azamat ustaldy

ASTANA. KAZINFORM - Almaty oblysynda memleketaralyq izdeýde júrgen tórt sheteldik azamat ustaldy. Bul týraly ІІM baspasóz qyzmeti habarlady.

Ótken aptada óńir aýmaǵynda júrgizilgen jedel is-sharalar barysynda óz elinde túrli qylmys jasady degen kúdikpen kórshiles eldiń azamattary ustaldy. Olardyń qatarynda 1981 jyly týǵan bir áıel jáne 1980, 1989, 1990 jyldary týǵan úsh er adam bar.

Polıtsııa málimetinshe, ustalǵandardyń biri asa iri kólemdegi alaıaqtyq úshin, ekinshisi azamattardy taý-ken-metallýrgııa kombınatyna jumysqa ornalastyrý syltaýymen aldaǵany úshin izdeýde bolǵan.

Áıel adam mobıldi telefondardy satý arqyly túsken aqshany ıemdenip alǵan degen kúdikke ilinse, taǵy bir er adam ekonomıkalyq qylmys jasaǵany úshin izdeýde bolǵan.

Aldyn ala málimet boıynsha sheteldikter Qazaqstan aýmaǵynda jasyrynyp, munda da qylmystyq áreketterin jalǵastyrýdy kózdegen bolýy múmkin. Jedel aqparattyń nátıjesinde polıtsııa qyzmetkerleri olardy quryqtady.

- Qazir olar ýaqytsha ustaý ızolıatoryna qamaldy. Ustalǵandardy óz eline qaıtarý máselesi qarastyrylyp jatyr. Sonymen qatar olardyń ózge de qylmystarǵa qatysy bar-joǵy tekserilip jatyr, - dep málimdedi polıtsııa ókilderi.

Almaty oblysy Polıtsııa departamenti halyqaralyq quqyq qorǵaý organdarymen ornatylǵan ózara is-qımyl qoǵamdyq qaýipsizdikti qamtamasyz etip, transshekaralyq qylmyspen kúreste tıimdi nátıje berip otyrǵanyn atap ótti.

Aıta keteıik, Astananyń qylmystyq ister jónindegi mamandandyrylǵan aýdanaralyq soty Eldos Qospaevtyń aǵasy Aıbek Qospaevqa qatysty sot úkimin shyǵardy.