Almaty oblysynda mektep oqýshylaryna quqyqtyq mádenıet oqytylady

ASTANA. KAZINFORM — Jańa oqý jylynan bastap Almaty oblysynyń mektepteri men kolledjderinde quqyqtyq mádenıet boıynsha qosymsha sabaqtar ótkiziledi, dep habarlaıdy Oqý-aǵartý mınıstrligi.

Bul joba Memleket basshysynyń tapsyrmasymen «Zań jáne tártip» ıdeologııasy aıasynda júzege asyrylady.

Pılottyń birinshi kezeńinde qosymsha sabaqtar Talǵar aýdanyna qarasty 10 mektep pen 3 kolledjde engiziledi. Jobanyń basty maqsaty — oqýshylardyń quqyqtyq sanasyn qalyptastyrý, zańdy qurmetteýge úıretý, sonymen qatar zorlyq-zombylyq, býllıng jáne ózge de quqyqbuzýshylyqtardyń aldyn alý.

Sabaqtardy arnaıy daıyndyqtan ótken, prokýratýra jáne polıtsııada qyzmet etken tálimgerler júrgizedi. Tálimgerlerdi oqytý 7–8 tamyz kúnderi bastalady.

— Biz quqyqtyq sananyń negizin mektep qabyrǵasynan bastap qalaımyz. Tálimgerler balalarǵa óz quqyqtary men mindetterin túsindirip qana qoımaı, zańdy qurmetteýge, jaýapkershilikti sezinýge jáne syndarly minez-qulyq daǵdylaryn qalyptastyrýǵa kómektesedi. Bul — bolashaqta ornyqty quqyqtyq mádenıetti qalyptastyrýdyń kilti, — dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Pılottyq mektepter men kolledjderde oqý jylynda 7–10 synyp oqýshylary men kolledj stýdentteri úshin barlyǵy 36 sabaq ótkizý josparlanǵan. Sabaqtar eki aptada bir ret ótip turady, aldyn ala jáne qorytyndy dıagnostıka jáne oqýshylardyń minez-qulqyna turaqty monıtorıng júrgiziledi.

Ádistemelik materıaldardy QR Oqý-aǵartý mınıstrligine qarasty «Órken» balalardyń ál-aýqatyn arttyrý jónindegi ulttyq ǵylymı-praktıkalyq ınstıtýty Bas prokýratýra janyndaǵy Quqyq qorǵaý organdary akademııasymen birlesip ázirlegen. Aldaǵy ýaqytta joba elimizdiń ózge óńirlerinde de jalǵasyn tabady dep josparlanyp otyr.

Buǵan deıin Almaty oblysynda bıyl qansha jańa mektep ashylatyny aıtyldy.