Almaty oblysynda mektep muǵalimi aǵylshyn tilin rep arqyly úıretedi

ASTANA. KAZINFORM — Áleýmettik jelilerde «Mıster Omırbek» atymen tanymal aǵylshyn tili pániniń muǵalimi Ómirbek Janqýatov oqýshylardyń qyzyǵýshylyǵyn arttyrý úshin tyń ádisterdi qoldanyp júr, dep habarlaıdy Almaty oblysynyń ákimdigi.

Jas pedagog TikTok jelisinde jarııalaǵan beınerolıkteri arqyly keńinen tanymal boldy. Ol beınematerıaldarda mektep oqýshylaryn aǵylshyn tilin mýzykalyq kompozıtsııalar arqyly úıretedi.

— 34 jastaǵy Ómirbek Janqýatov buǵan deıin Almaty oblysy Baıserke aýylyndaǵy № 28 mektep-gımnazııasynda eńbek etken. Qazirgi tańda ol Іle aýdany Qosózen aýylyndaǵy mektepte sabaq beredi. Onyń oqytý tásili shyǵarmashylyqqa negizdelgen: sabaq barysynda oqýshylar aǵylshyn sózderi men sóz tirkesterin rep yrǵaqtaryna qosyp jattaıdy. Mundaı ádis bilim alý protsesin qyzyqty ári jeńil etedi, — delingen ákimdik taratqan aqparatta.

Ómirbek Janqýatovtyń kásibı jetistikteri óńirlik deńgeıde de joǵary baǵalandy. Ol «Qazaqstannyń úzdik muǵalimi» baıqaýynyń oblystyq kezeńinde jeńimpaz atandy. Jaqyn arada ustaz jańa avtorlyq baǵdarlamasyn usynbaq, ony oqýshylar asyǵa kútýde.

Ustazdyq — úzdiksiz izdenisti, kásibı damýdy talap etetin abyroıly mamandyq. Ómirbek Janqýatovtyń tájirıbesi shyǵarmashylyq pen kásibılikti ushtastyrý arqyly zamanaýı bilim berýdiń jańa múmkindikterin ashýǵa bolatynyn dáleldep otyr.

Aıta keteıik, buǵan deıin bilim júıesinde «Eńbek Eri» ataǵyn alǵan qansha ustaz eńbek etip jatqanyn jazǵan edik.