Almaty oblysynda MÁMS esebinen 28 myńǵa jýyq ota jasaldy

QONAEV. KAZINFORM - Almaty oblysynda bıyl MÁMS arqyly 27 700 ota jasalǵan. Bul týraly ÁMSQ Almaty oblystyq fılıalynyń dırektory Tileýhan Ábildaev baspasóz máslıhatynda baıandady. 

Qordyń Almaty oblystyq fılıalynyń dırektory Tileýhan Ábildaevtyń aıtýynsha, turǵyndar jyl basynan MÁMS aıasynda jalpy somasy 34,8 mlrd teńgege medıtsınalyq kómek alǵan.
Kórsetilgen qyzmetterdiń ishinde statsıonarlyq kómek pen qymbat dıagnostıkalyq qyzmetke suranys joǵary.

Sonymen qatar 2 mlrd teńgege medıtsınalyq ońaltý qyzmeti kórsetilgen jáne ambýlatorııalyq dári-dármekpen qamtamasyz etý úshin 12,6 mlrd teńgege 570 myńnan astam retsept jazylǵan.

- Densaýlyq saqtaý salasynda áli de birqatar máseleler bar. Bıyl óńirdegi klınıkalarda somasy 1,7 mlrd teńgege 291 myńnan astam zańbuzýshylyq tirkeldi. Olardyń qatarynda emdeý-dıagnostıkalyq standarttardyń saqtalmaýy, qyzmet qunyn negizsiz kóterý syndy derekter anyqtaldy. Odan bólek, fılıal sarapshylary kórsetilmegen qyzmetterdi tirkeý boıynsha 438 jaǵdaıdy anyqtap, atalǵan jaǵdaılar boıynsha aıyppul salynyp, 14 mln teńgeden astam qarajat memleketke qaıtaryldy, - dedi ol.

Sondaı-aq jyl basynan beri Áleýmettik medıtsınalyq saqtandyrý qoryna oblys turǵyndarynan 2 610 ótinish túsken, onyń 1 218-y – shaǵym. Turǵyndar kóbine emhanalardaǵy uzaq kezek, konsýltatsııalyq-dıagnostıkalyq qyzmetterdiń qoljetimsizdigi jáne statsıonarlyq kómek sapasynyń tómendigine shaǵymdanady.

Aıta ketken jón, búgingi kúni Almaty oblysynda 1,3 mıllıonnan astam turǵyn saqtandyrylǵan bolsa, 295 myń turǵyn áli de MÁMS júıesine tirkelmegen.

Eske salaıyq, buǵan deıin almatylyqtarǵa MÁMS esebinen 1 myńnan astam konsýltatıvtik qyzmet kórsetilgenin jazǵan edik.