Almaty oblysynda mal ustaý talabyn buzǵan adam jaýapqa tartylatyn boldy

ASTANA. KAZINFORM – Instagram áleýmettik jelisinde Almaty oblysy, Qarasaı aýdany, Raıymbek aýyldyq okrýgi, Qyrǵaýyldy aýylynda sanıtarlyq talaptarǵa saı kelmeıtin jaǵdaıda aýyl sharýashylyǵy janýarlaryn ósirip jatqany týraly vıdeo tarady.

«Tekserý jumystarynyń barysynda bul jaǵdaı jeke tulǵanyń aýlasynda bolǵany, ol jerde 60 bas shoshqa, 30 bas jylqy 3 bas iri qara bar ekeni anyqtaldy. Búgingi kúni atalǵan aýyl sharýashylyq janýarlarynyń ishinde aýyl sharýashylyǵy janýarlaryn brdeılendirý (AShJB) bazasynda mal ıesiniń atynda 10 bas shoshqa, 3 bas múıizdi iri qara, 7 bas jylqy ǵana tirkelgen. Osylaısha, «Veterınarııa týraly» zańynyń buzylýy baıqalady, ıaǵnı, janýardyń ıesi aýyl sharýashylyǵy janýaryn satyp alý/týý faktisin tirkeýge jáne tıisti rásimderdi júrgizýge mindetti»,-delingen habarlamada.

Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly Zańynyń 6-babynyń 2-2-tarmaǵyna sáıkes eldi mekenderde aýyl sharýashylyǵy janýarlaryn asyraý, aýyl sharýashylyǵy janýarlaryn jaıý, úı janýarlaryn ustaý, janýarlardy aýlaý, ýaqytsha ustaý jáne jansyzdandyrý boıynsha qaǵıdalardy ázirleý, onyń oryndalýyn qadaǵalaý jergilikti atqarýshy organnyń quzyryna jatady.

Osy rette, 2023 jyly profılaktıkalyq is-sharalar josparǵa saı júrgizilgen, ıaǵnı tirkelgen mal pasterellezge, sibir jarasyna, qarasanǵa, aýsylǵa qarsy vaktsına alǵan. Al tirkeýde joq maldarǵa baılanysty dıagnostıkalyq tekserýler júrgizilmegen. 2024 jyldyń veterınarııalyq is-sharalary josparǵa saı aldaǵy aılarda júrgiziletin bolady.

Vıdeoda kórsetilgen jaǵdaı boıynsha Іle aýdany, Mejdýrechensk aýyldyq okrýginde ornalasqan zooqorǵaýshynyń jeke mal ustaý orny tekserildi.

Ákimdiktiń aqparatyna sáıkes maldyń ıesi ony satýǵa kelisken. Mal ustaý normalaryn saqtamaǵany úshin mal ıesi ákimshilik jaýapqa tartylatyn bolady.

«Sonymen qatar, vıdeony taratý barysynda ólgen mal men basqa úı janýarlary birge turǵany týraly aqparat shyndyqqa janaspaıdy. Tekserý barysynda ólgen maldyń denesi tabylǵan joq. Sol sebepti, jalǵan aqparat taratpaýǵa, sonymen qatar tek resmı aqparatqa júginýge shaqyramyz»,-delingen mınıstrliktiń habarlamasynda.

Osyǵan deıin Almaty oblysynyń turǵyny tiri maldy ólekselerdiń ishinde ustaǵany týraly jazdyq.