Almaty oblysynda qurylysyna 1,6 mlrd teńge jumsalǵan mádenıet úıi qashan iske qosylady

QONAEV. KAZINFORM - Almaty oblysy Іle aýdanynda birneshe jyldan beri mádenıet úıiniń qurylysy bitpeı keledi.

Jyl basynda Ótegen batyr aýylyndaǵy 400 oryndyq Mádenıet úıiniń qurylysy 2022 jyly bastalyp, 2025 jylǵa deıin tek jartylaı ǵana aıaqtalǵanyn jazǵanbyz.

Mádenı nysannyń qurylysy qazir qandaı satyda ekenin anyqtaý úshin agenttik jaýapty vedomstvoǵa saýal joldady.

Almaty oblysy qurylys basqarmasynyń jaýabyna sáıkes, Ótegen batyr aýylynda mádenıet úıiniń qurylysy 80 paıyzǵa aıaqtalǵan. Qazirgi tańda ishki, syrtqy árleý jáne abattandyrý jumystary júrgizilip jatyr. Merdiger uıym - «AK Construction Company» JShS.

- Osy jyldyń qyrkúıek aıynda atalǵan mádenıet úıin qoldanysqa berý josparlanyp otyr, - dep naqtylady basqarmadan.

Resmı jaýapqa sáıkes, mádenı nysannyń qurylysyna 2022 jyly 147,8 mln teńge, 2023 jyly 857,6 mln teńge, 2024 jyly 225,02 mln teńge, 2025 jyly 386,95 mln teńge jumsalǵan. Oblystyq qurylys basqarmasy nysandaǵy jumystardyń birneshe jylǵa sozylýyna alǵashqy jobada qatelikterdiń ketýi sebep bolǵanyn habarlady.

- Ótegen batyr aýylyndaǵy 400 oryndyq mádenıet úıiniń qurylysynyń birneshe jylǵa sozylyp ketýiniń sebebi - jobalaý-smetalyq qujattamaǵa túzetý engizý kerek boldy. Jobalaý barysynda qujattaǵy kemshilikter jáne úshinshi tehnıkalyq qabatty paıdalaný úshin jumys jobasy túzetildi, - dep túsindirdi vedomstvodan.

Sondaı-aq basqarma jaýabynda nysannyń qurylysy sozylyp ketýine kináli tulǵalar, sol kezdegi bólim basshylary qyzmetten bosatylǵany atap ótildi.

Jalpy Ótegen batyr aýylynan bólek qazirgi ýaqytta oblysta 4 mádenıet úıiniń qurylysy júrip jatyr. Olar: Kegen aýdany Jylysaı aýyly, Qarasaı aýdany Jandosov, Áıteı aýyldary, Іle aýdany Boraldaı aýyly.

Eske salaıyq, buǵan deıin Almaty oblysynda bıyl qansha jańa mektep ashylatynyn jazǵanbyz.