Almaty oblysynda quny 289 mlrd teńge bolatyn metallýrgııalyq zaýyt salynyp jatyr
QONAEV. KAZINFORM – Almaty oblysyndaǵy «Qazybek bek» ındýstrııalyq aımaǵynda Asia United Steel stal óndirý jelisiniń qurylysy bastaldy. Bul joba óńirdiń jańa ónerkásiptik alyptarynyń biri retinde baǵalanyp otyr.
Almaty oblysynyń ákimdigi málimetinshe, zaýyt shamamen 600 jumys ornyn ashýdy kózdep otyr, úsh kezeńde júzege asyrylady, jylyna 1,2 mln tonna bolat óndiredi jáne elimizdiń ońtústigindegi eń iri metallýrgııalyq kásiporyndardyń birine aınalmaq.
Alpaýyt nysannyń alǵashqy irgetasyn qalaý rásimine Almaty oblysynyń ákimi Marat Sultanǵazıev, jergilikti atqarýshy organdardyń ókilderi, sheteldik ınvestorlar men jobalyq uıymdardyń basshylary qatysty.
Óńir basshysy bul qadam oblystyń ǵana emes, tutas el ekonomıkasynyń áleýetin arttyratynyn atap ótti. Memleket basshysy Qasym-Jomart Toqaev halyqqa Joldaýynda óńdeý ónerkásibin damytýǵa serpin berý qajettigin aıtqan bolatyn.
– Asia United Steel zaýytynyń qurylysy – óńirdiń jańa ındýstrııalyq serpiliske jasaǵan qadamy. Árbir osyndaı zaýyt – jańa múmkindikter, jumys oryndary, tehnologııalar men bıýdjetke quıylatyn salyq. Oblys óz óndiristik qańqasyn qalyptastyryp, el ekonomıkasyn nyǵaıtyp keledi, joba strategııalyq mańyzǵa ıe, - dedi óz sózinde Marat Sultanǵazıev.
Óndiristik alań «Qazybek bek» ındýstrııalyq aımaǵynda 78 gektar jerge ornalaspaq. Bul aımaqta jalpy quny 640 mlrd teńgeden asatyn jobalar portfeli bar 11 ınvestor ornalasqan, shamamen 2,5 myń jumys ornyn qamtamasyz etedi. Almaty oblysy ındýstrııalyq aımaqtarynyń basqarýshy kompanııasynyń bas dırektory Erbol Shokaevtyń aıtýynsha, ınvestorlarǵa ındýstrııalyq aımaqtyń 900 gektarynyń 567 gektary bólingen.
Aldaǵy eki jylda aımaq tolyqqandy ınjenerlik ınfraqurylymmen qamtamasyz etiledi — 150 MVt elektr qýaty, táýligine 8000 m³ sý, táýligine 100 vagondyq júk jóneltýge múmkindik beretin temirjol logıstıkasy. Qurylysty bastaý úshin qatysýshylar ýaqytsha elektr jáne sý jelilerimen qamtylǵan.
Investorlar da sóz sóılep, Almaty oblysyn eń basym baǵyttardyń biri retinde tańdaǵanyn jetkizdi.
– Biz sizdermen yntymaqtastyqta qýana jumys isteımiz. Uzaq taldaýdan keıin bolat óndirý zaýytyn salý úshin dál osy óńirdi tańdadyq. Maqsatymyz – Ortalyq Azııany shıkizatpen qamtamasyz etip, zamanaýı óndiris qurý, - dedi Asia United Steel kompanııasynyń negizin qalaýshy Lın Gýoşýn.
Aıta keteıik, jobany tolyqtaı sheteldik ınvestorlar qarjylandyrady. Óndiris ishki jáne syrtqy naryqta joǵary suranysqa ıe qurylys jáne óndiristik ónimder óndirýge baǵyttalady.
Kapsýla salý rásiminiń aldynda Jambyl aýdanynyń aqsaqaly Abden Esperov quttyqtaý sóz sóılep, bul oqıǵa turǵyndar úshin aıtarlyqtaı qýanysh ekenin aıtty. Aqsaqal jobanyń aýyl turǵyndary úshin jańa jumys oryndarynyń ashylýyna múmkindik beretinin málimdep, bastamanyń tabysty ári berekeli bolýyn tiledi.
Kásiporyn qurylysy birneshe kezeńnen ótip 2027 jylǵa deıin tolyq aıaqtalmaq. Zaýyt balqytýǵa arnalǵan energııa tıimdi peshtermen jabdyqtalady. Elektr energııasynyń qoldanylýy qorshaǵan ortaǵa keletin zııandy barynsha azaıtady, al óndiris tolyqtaı ekologııalyq standarttarǵa saı bolady.
Jobalyq qýatqa shyqqannan keıin Asia United Steel Qazaqstandaǵy bolat ónimderin eksporttaıtyn jetekshi kásiporyndardyń birine aınalyp, óńirdiń ǵana emes, tutas eldiń óńdeý sektoryn kúsheıtedi.