Almaty oblysynda quqyǵy buzylǵan tutynýshylar 165 mln teńge qaıtaryp aldy

QONAEV. KAZINFORM — Almaty oblysy saýda jáne tutynýshylardyń quqyqtaryn qorǵaý departamenti basshysy Jeńisbek Ahmetov 11 aıdaǵy jumys qorytyndysyn jarııalady.

Onyń aıtýynsha, áleýmettik mańyzy bar azyq-túlik taýarlaryn ruqsat berilgennen (15%) kóp saýda ústemesimen satqan kásipkerler anyqtalǵan. Barlyǵy 2025 jyldyń 11 aıynda zań talaptaryn buzǵan 43 kásipker ákimshilik jaýapkershilikke tartyldy.

Odan bólek departamentke 11 aıda tutynýshylar quqyqtarynyń buzylýyna baılanysty 2240 ótinish túsken. Onyń ishinde:

— bólshek saýdada — 40%;
— bilim salasy — 30%;
— Týrıstik sala — 7,5%;
— Elektrondyq saýda — 5%
— turmystyq qyzmetterde — 4%;
— turǵyn úı-kommýnaldyq sharýashylyqta — 3,5%;
— jáne t. b. — 10%;

— Túsken ótinishterdiń qorytyndysy boıynsha tutynýshylarǵa 165 mln teńge mólsherinde aqshalaı qarajat qaıtaryldy, ıaǵnı túsken ótinishtiń 89,1 paıyzy qanaǵattandyryldy. Sonymen qatar jyl basynan beri 24 ónim satyp alynyp, tehnıkalyq reglametterge saı kelmeıtin 5 taýar anyqtaldy, — dedi Jeńisbek Ahmetov.

Sondaı-aq ol óńirdegi 60 saýda bazardyń 10-y jańǵyrtylyp jatqanyn atap ótti. Onyń ishinde: Qonaev qalasyndaǵy Aısha sıtı bazary, Qarasaı aýdanyndaǵy Altyn orda bazary, Talǵar qalasyndaǵy Táýip bazary jáne ózgeleri bar.

— Alaıda qazirgi tańda saýda bazarlaryn jańǵyrtý jumystary kesheýildep, jol kartasynda kórsetilgen tapsyrmalar ýaqytyly oryndalmaýda. Buǵan sáıkes departament tarapynan tıisti basqarmalarǵa hat joldanyp, bazar basshylyǵymen jáne qala, aýdan ákimdikterimen birlesip, kezdesý uıymdastyrylyp, eskertý jasaldy, — dedi ol.

Eske salaıyq, buǵan deıin qyzylordalyq tutynýshylar 21 mln teńge qarjysyn qaıtaryp alǵanyn jazǵanbyz.