Almaty oblysynda kóshede ketip bara jatqan jigitti soqqyǵa jyqqandardyń ekeýi ustaldy

QONAEV. KAZINFORM – Almaty oblysy Besaǵash aýylynda bir top adam kóshede ótip bara jatqan jigitti uryp-soqqan.

Jábirlenýshiniń aıtýynsha, ony úıine qaıtyp bara jatqanda top bolyp turǵan adamnyń biri «túrtip ótken». Ol eskertý jasaǵannan keıin janjal shyqqan. Oqıǵanyń vıdeosy áleýmettik jelide tarady. 

Almaty oblysy polıtsııa departamentiniń habarlaýynsha, osy áreketke qatysty «Buzaqylyq» baby boıynsha qylmystyq is tirkeldi.
Eki kúdikti ustalyp, ýaqytsha ustaý ızolıatoryna qamaldy.

Qylmystyq is aıasynda oqıǵanyń tolyq mán-jaıyn anyqtaý úshin qajetti tergeý amaldary júrgizilip jatyr. 

– Sonymen birge oqıǵaǵa qatysy bar basqa adamdardy anyqtaý jáne olardyń ornalasqan jerin tabý boıynsha jedel izdestirý sharalary júrgizilip jatyr. Tergeý barysy Almaty oblystyq polıtsııa departamenti basshylyǵynyń baqylaýynda, - dep habarlady vedomstvo.

Eske salaıyq, buǵan deıin Almatydaǵy «Kaspıı» turǵyn úı kesheni aýlasynda jappaı tóbeles bolǵanyn jazǵanbyz.

Qalalyq polıtsııa departamenti janjalǵa qatysqan kúdiktiler ustalǵanyn habarlady. Alataý aýdandyq polıtsııa basqarmasy buzaqylyq deregi boıynsha qylmystyq is qozǵaǵan.