Almaty oblysynda kortej qatysýshylaryna 600 dollar usynǵan jigit qamaldy
QONAEV. KAZINFORM – Almaty oblysynda jol erejesin óreskel buzyp, kortej uıymdastyrǵan adam jaýapkershilikke tartyldy.
Almaty oblysynyń polıtsııasynyń málimetinshe, jedel-izdestirý is-sharalary barysynda 22 jastaǵy Dıas Ádilbekovtiń Shymkentte júrgeni anyqtaldy.
Sot sheshimimen ol 10 táýlikke ákimshilik qamaýǵa alyndy.
- Dıas Ádilbekov negizgi kóliktiń sońynan birinshi bolyp jetken júrgizýshige 600 dollar syıaqy usynǵan. Keıin kortej qatysýshylary jalpy paıdalanymdaǵy joldarda Jol qozǵalysy erejesin óreskel buzyp, azamattardyń ómiri men qaýipsizdigine qaýip tóndirgen, - dep málimdedi Almaty oblystyq PD.
Polıtsııa oqıǵanyń barlyq mán-jaıyn anyqtap, kináli tulǵalardy zańda belgilengen jaýapkershilikke tartý boıynsha jumysty jalǵastyryp jatyr.
Eske salaıyq, buǵan deıin Almaty oblysynda kortej uıymdastyryp, jol erejesin buzǵan eki adam 10 táýlikke qamalǵan edi.
