Almaty oblysynda kompanııa qyzmetkerine 28 mln teńgelik protez satyp alyp beretin boldy
QONAEV. KAZINFORM — Almaty oblysynda óndiris ornynda alǵan jaraqat saldarynan múgedek bolyp qalǵan azamat jumys berýshini sot arqyly qymbat protez alyp berýge mindettedi.
Іle aýdandyq sotynda qaralǵan is materıaldaryna sáıkes, talapker eńbek mindetterin oryndaý kezinde aýyr jaraqat alyp, sonyń saldarynan qol basy ampýtatsııalanǵan. Keıin oǵan múgedektik taǵaıyndalyp, eńbekke jaramsyz bolyp qalǵan.
Medıtsınalyq-áleýmettik saraptama qorytyndysy azamattyń ómir boıy protezdeýdi qajet etetinin rastaǵan. Sot jaraqattyń óndiriste bolǵanyn jáne talapkerdiń qalypty ómirge oralýy úshin joǵary tehnologııalyq protez qajet ekenin eskerdi.
— Zańnama talaptaryn eskere otyryp, sot JShS-ny J.E. úshin «Respýblıkalyq protezdik-ortopedııalyq ortalyq» AQ-men «Manıfesto» mıkroprotsessorlyq basqarýy bar kópqarmaly qol protezin daıyndaý jáne satyp alý týraly 28 606 425 (jıyrma segiz mıllıon alty júz alty myń tórt júz jıyrma bes) teńge somasyna shart jasaýǵa mindettedi, — delingen sottyń baspasóz qyzmeti taratqan habarlamada.
Shart sot sheshimi zańdy kúshine engen kúnnen bastap bir aı ishinde jasalýǵa tıis. Sonymen qatar kompanııa protezdiń naqty satyp alý kezindegi qunyn tolyq tóleýge, sondaı-aq protezdeý kezeńinde medıtsınalyq statsıonarda turý shyǵyndardy óteýge tıis.
Sot sheshimi zańdy kúshine endi.
Eske salaıyq, buǵan deıin Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev óndiris ornyndaǵy jaraqat alý derekterin anyqtaý máselesine qatysty túsinik bergen edi.
Al Premer-mınıstr Oljas Bektenov eńbek qaýipsizdigine qatysty KPI engizýdi usynyp, onyń oryndalýy basshylardyń jalaqysy men qyzmette qalýyna tikeleı áser etýi keregin aıtty.
