Almaty oblysynda kólikter laıǵa batyp qaldy: ákimdik túsinik berdi

QONAEV. KAZINFORM – Almaty oblysy Qarasaı aýdany ákimdigi Shalqar aýyly turǵyndarynyń joldardyń ahýalyna qatysty shaǵymyna jaýap berdi.

Áleýmettik jelilerde Bolashaq kóshesinde kólikterdiń laıǵa batyp, júrý qıyndaǵanyn kórsetetin vıdeo tarady. Mundaı jaǵdaı aýyldyń ózge kóshelerinde de baıqalyp, turǵyndardyń qozǵalysyn qıyndatqan. 

Ákimdiktiń habarlaýynsha, qazirgi ýaqytta Jandosov aýyldyq okrýgine qarasty Shalqar aýylynda aýyzsý júıesin qaıta qurý jáne jańadan salý jumystary júrgizilip jatyr.

Bul jobaǵa tapsyrysty Qarasaı aýdanynyń turǵyn úı-kommýnaldyq sharýashylyq jáne turǵyn úı ınspektsııasy bólimi berse, merdiger qyzmetin «Karat Z» JShS atqaryp jatyr.

– Nysannyń qurylysy áli aıaqtalmaǵan. Jumystar tolyqtaı 2026 jyldyń jeltoqsan aıynda bitedi dep josparlanǵan. Sý qubyrlaryn tartý barysynda aýyldyń keıbir kóshesindegi joldarǵa zaqym kelgen, - delingen habarlamada.

Jergilikti bılik merdiger kompanııamen arnaıy túsindirý jumystaryn júrgizip, joldardy qum men qıyrshyqtas qospasymen qalpyna keltirýdi, júretin bóligin tehnıkalyq talapqa saı etý keregin eskertken.

Qazirgi ýaqytta eki kóshede qum-qıyrshyqtas tóseý jumystary aıaqtalǵan. Al 20 aqpannan bastap merdiger aýyldaǵy taǵy segiz kóshede joldardy qalpyna keltirý jumysyn bastaıdy.

Sonymen qatar Shalqar aýylyndaǵy uzyndyǵy 1,5 shaqyrym bolatyn Bolashaq kóshesine ortasha jóndeý júrgizý úshin tehnıkalyq qujattar daıyndalǵan. Osy qujattarǵa súıene otyryp, jóndeý jumystaryna bıýdjetke ótinish berilgen. Qarjy bólinip, sý qubyryn qaıta jańartý aıaqtalǵan soń kóshege asfalt tóseý josparlanyp otyr.

Eske salaıyq, buǵan deıin Almaty oblysynda aýdan joldaryn jóndeýge bıyl 25 mlrd teńge bólingenin habarlaǵan edik.