Almaty oblysynda kólik aıaldamany soǵyp, eki adam qaza tapty

QONAEV. KAZINFORM — Almaty oblysynyń Іle aýdanynda júk kóliginiń júrgizýshisi avtobýs aıaldamasyna kirip ketip, eki adamdy qaǵyp óltirdi. 

Bul jaıynda Almaty oblysy polıtsııa departamentiniń bastyǵy Baýyrdan Álenov habarlady.

Onyń aıtýynsha, 12 mamyrǵa qaraǵan túni Baıserke aýylyn patrýldeý kezinde «Berkýt-35» ekıpaj qyzmetkerleri ZIL-131 avtokóliginiń júrgizýshisin mas bolýy múmkin ekenine kúmándanǵan.

Júrgizýshi patrýldik polıtsııa qyzmetkerleriniń toqta degen talabyn elemeı, qýǵyn-súrginnen qashyp qutylýǵa tyrysady.

Saldarynan júk kólikti basqarǵan 49 jastaǵy er adam qatty jyldamdyqpen avtobýs aıaldamasyna jyldamdyqpen kirip ketti. 

«Aıaldamada turǵan eki adam oqıǵa ornynda kóz jumdy, úsheýi túrli jaraqattarmen aýdandyq aýrýhanaǵa jatqyzyldy. Medıtsınalyq saraptamanyń nátıjesine sáıkes quqyq buzýshy kólikti orta dárejede mas kúıinde basqarǵan. Er adam ýaqytsha ustaý ızolıatoryna qamaldy, avtokólik arnaıy turaqta» deıdi polıtsııa departamentiniń bastyǵy. 

Eki adamnyń ólimine ákep soqqan jol-kólik oqıǵasy faktisi boıynsha qylmystyq is tirkeldi. Tergeý amaldary júrip jatyr.