Almaty oblysynda qoqys polıgonyndaǵy órtti sóndirýge 120-ǵa jýyq adam jumyldyryldy
ASTANA. KAZINFORM — Oqıǵa ornynda Almaty oblysy TJD bastyǵy, polkovnık Dáýren Orazbekovtiń basshylyǵymen jedel shtab quryldy, dep habarlaıdy TJM baspasóz qyzmeti.
Búgingi tańda qatty turmystyq qaldyqtar polıgonyn sóndirý jáne qalpyna keltirý jumystary jalǵasyp jatyr. Jekelegen ýchaskelerde 10 metrge deıingi tereńdikte byqsý baıqalady.
— Órt oshaqtaryn sóndirý úshin ınertti materıaldar qoldanylyp jatyr. Jel baǵytynyń jıi ózgerýi qosymsha qıyndyqtar týǵyzyp otyr. Polıgonnyń aýdany boıynsha soqamen jyrtý jumystary júrgizildi. Barlyǵy 7 órt sóndirý ýchaskesi quryldy, — delingen vedomstvo habarlamasynda.
Oqıǵa ornynda Almaty oblysy TJD bastyǵy, polkovnık Dáýren Orazbekovtiń basshylyǵymen jedel shtab quryldy.
Órtti sóndirý jumystaryna Almaty oblysy, Almaty qalasy TJD, TJM 28237 áskerı bólimi, jergilikti atqarýshy organdar, «Qazseldenqorǵaý» jáne Almaty qalasy TJD Qutqarý qyzmetiniń 120-ǵa jýyq adamy men 60-tan astam tehnıkasy jumyldyryldy. Órt sóndirý aımaǵyna sýdy úzdiksiz jetkizý úshin Tereńqara ózenine sorǵy-jeńdi avtomobıl ornatyldy. Qutqarýshylar dıametri 77 mm 70 jeńnen turatyn magıstraldy jeli tartty, oǵan 6 tehnıka jumyldyrylǵan.
— Bul sharalar órtti tıimdi sóndirý úshin qajetti qysym men sýdyń jetkilikti mólsherin qamtamasyz etýge múmkindik beredi. Jaǵdaı Tótenshe jaǵdaılar mınıstrliginiń baqylaýynda. Órttiń jaqyn mańdaǵy aýmaqtarǵa taralý qaýpi joq, — delingen taratylǵan aqparatta.
Osydan buryn órt shyqqan kásiporynǵa buryn zań buzǵany úshin aıyppul salynǵany anyqtaldy.