Almaty oblysynda qoqys polıgonynda shyqqan órtti sóndirip jatyr
ASTANA. KAZINFORM — Almaty oblysynda qoqys polıgony tańerteńnen beri janyp jatyr. Kásiporynǵa buryn zań buzǵany úshin aıyppul salynǵan.
Almaty oblysyndaǵy qoqys polıgonyndaǵy órtti sóndirý órt júktemesiniń joǵary bolýyna baılanysty qıynǵa soǵyp jatyr.
Órt oshaqtarynyń 10 metrden astam tereńdikte bolýy jáne qubylmaly ekpindi jeldiń, lak-boıaý materıaldarynyń bolýy órt sóndirý jumystaryn kúrdelendirip otyr. Bul faktorlar ottyń taralýyn kúsheıtip, órt sóndirýshilerdiń jumysyn qıyndatyp otyr.
– Atalǵan QTQ polıgonyn paıdalanyp otyrǵan kásiporyn ekologııalyq jáne órt qaýipsizdigi salasynda zań buzýǵa baılanysty eki ret ákimshilik jaýapkershilikke tartylǵan, – dep naqtylady TJM.
Vedomstvo órt qaýipsizdigi erejeleriniń talaptaryna sáıkes, olardy saqtamaǵany úshin jaýapkershilik obektilerdiń menshik ıelerine, sondaı-aq uıym basshylary men múlikti ıelenýge, paıdalanýǵa nemese basqarýǵa ýákiletti tulǵalarǵa júkteletinin eske saldy.
Órtti sóndirý jumystary jalǵasyp jatyr. Jaǵdaı TJM baqylaýynda. Ottyń jaqyn mańdaǵy aýmaqtarǵa taralý qaýpi joq.
Aıta ketelik Qyzylordada ruqsatsyz qoqys tastalǵan oryndar sany 5 ese azaıdy.