Almaty oblysynda qysta 600 myń tonnadan astam kómir jaǵylady
QONAEV. KAZINFORM — Turǵyndardy kómirmen qamtamasyz etý úshin Almaty oblysyna 379 myń tonna qatty otyn jetkizildi.
Almaty oblysy ákimdiginiń málimetinshe, bıyl qysta halyq 666 myń tonna kómir jaǵady dep josparlanǵan. Qazir qoımalarǵa qajetti otynnyń 57 paıyzy jetkizilgen. Qalǵany jylý maýsymy aıaqtalǵansha kezeń-kezeńimen tasymaldanbaq.
— Oblys aýmaǵynda kómir satatyn 35 pýnkt jumys isteıdi. Onda negizinen «Shubarkól» men «Qarajyra» jáne «Oıqaraǵaı» ken ornynyń qońyr kómiri satylyp jatyr. Bir tonna qatty otynnyń baǵasy 24 000-27 000 teńge aralyǵynda. Ol qoımanyń ornalasqan jerine jáne temirjol tuıyǵynan qashyqtyǵyna baılanysty ózgeredi. Sondyqtan ár eldi mekende kómir quny ártúrli bolýy múmkin, — dep habarlady ákimdikten.
Almaty oblysynyń energetıka jáne sýmen jabdyqtaý basqarmasynyń basshysy Nurlan Ómirhanovtyń aıtýynsha, temirjol tuıyqtary joq eldi mekenderge kómir avtokólikpen tasymaldanady. Al shalǵaı ornalasqan Raıymbek jáne Kegen aýdandaryn qatty otynmen qamtamasyz etý úshin jergilikti «Oıqaraǵaı» ken ornynyń kómiri paıdalanylady.
— Kómir tapshylyǵy, jetkizilimniń keshigýi nemese baǵanyń negizsiz ósýi boıynsha turǵyndardan shaǵym tússe, olardy aýdan jáne qala ákimdikterimen, kómir jetkizýshilermen birlesip qaraımyz. Al kómir baǵasyn qoldan kóterý nemese naryqtaǵy básekelestikke kedergi keltirý derekteri anyqtalsa, tıisti materıaldar Básekelestikti qorǵaý jáne damytý agenttiginiń Almaty oblysy boıynsha departamentine joldanady. Sondyqtan turǵyndar shaǵymdanǵan kezde satýshynyń ataýyn, kómir satylatyn orynnyń mekenjaıyn, satyp alǵan kúnin jáne baǵasyn kórsetip, tólem túbirtegin qosa usynýy qajet. Bul máseleni jan-jaqty qaraýǵa kómektesedi, — dedi Nurlan Ómirhanov.
Eske salaıyq, Astanada kómir qaı jerde arzan satylatynyn jazǵanbyz.
