Almaty oblysynda qyryq jyl buryn salynǵan sý qubyrlary jańartylyp jatyr

QONAEV. KAZINFORM – Almaty oblysynyń Іle aýdanyna qarasty Aqshı aýylynda aýyz sýǵa qatysty týyndaǵan kúrdeli máseleni sheshý úshin jedel sharalar qabyldanyp jatyr. Jaǵdaı oblys ákimi Marat Sultanǵazıevtiń tikeleı baqylaýynda.

Apattyń negizgi sebebi — 1976 jyldary salynǵan «Bozoı» toptyq sý qubyrynyń tolyq tozýy. Sońǵy kúnderi magıstral birneshe tusynan jarylyp, aýylǵa sý berý jıi úzilgen. Tekserý barysynda qubyrdyń 2 shaqyrymnan astam bóligi jaramsyz dep tanylyp, bul ýchaskelerdi qalpyna keltirý ýaqytsha toqtatyldy.

Aýyz sý berý toqtaǵan kezeńde Іle aýdany ákimdigi arnaıy sý tasıtyn kólikterdi jumyldyryp, turǵyndardy táýlik boıy aýyz sýmen qamtamasyz etip otyr.

Máselege qatysty birqatar aýyl turǵyndary oblys ákimine áleýmettik jeli arqyly da júgingen.

Apparattyq keńeste Marat Sultanǵazıev máseleni shuǵyl sheshýdi tapsyrdy. Jaýapty basqarmalar men aýdan ákimdigine naqty mindet júktelip, tómendegi sharalar qolǵa alyndy:

• 18 qarashada TJD men aýdan ákimdigi apat ornyn tekseredi.

Almaty oblysynyń Tótenshe jaǵdaılar departamenti men Іle aýdanynyń ákimdigi apat aımaǵyn aralap, keltirilgen shyǵyndy naqtylaıdy.

• 2,6 shaqyrymdyq qubyr tolyq aýystyrylady.

- Tehnogendik tótenshe jaǵdaı rejımi aıasynda shamamen 2,6 km sý jelisin qaıta salý josparlanýda. Qazirgi tańda jobalyq-smetalyq qujattamany jańartý jáne jóndeý jumystaryna qajetti qarjyny naqtylaý júrip jatyr. Qubyrdy tolyq aýystyrý Aqshı aýylyn uzaq merzim boıy turaqty aýyz sýmen qamtamasyz etýge múmkindik beredi, - dep habarlady ákimdikten.

Búgin Іle aýdanynyń ákimi Qaıyrjan Jaqsymbetov jaǵdaı ornyna baryp, turǵyndarmen kezdesip, túsindirý jumystaryn júrgizdi. Ákimniń aıtýynsha, bir aıdyń ishinde barlyq aqaýlar qalpyna keltirilip, aýylǵa aýyz sý beriledi.

Qazirgi ýaqytta eldi mekendi sýmen qamtamasyz etý úshin tórt sý tasymaldaý kóligi úzdiksiz jumys istep tur.

Aıta keteıik, Almaty oblysynyń sharýalary PepsiCo-ǵa kartop jetkize bastady.