Almaty oblysynda keıýanaǵa dórekilik kórsetken polıtseı jumystan qýyldy

QONAEV. KAZINFORM — Almaty oblysynda 77 jastaǵy áıelge dórekilik tanytqan ýchaskelik polıtsııa ınspektory qyzmetinen bosatyldy. 

Buǵan deıin áleýmettik jelide polıtseıdiń zeınetker áıeldi kúshtep páterden shyǵaryp jatqan sáti túsirilgen vıdeo taraǵan edi.

Kadrlardan er adam áıeldi qatty ıterip jibergeni, al keıýana baspaldaq tutqasyna soǵylǵanyn baıqaýǵa bolady. Saldarynan áıeldiń birneshe qabyrǵasy synǵan.

Polıtsııa departamentiniń málimetinshe, oqıǵa boıynsha jan-jaqty qyzmettik tekseris júrgizilip jatyr. Al tártipke qaıshy áreket jasaǵan ınspektor jumystan shyǵarylǵan.

— Mundaı jaǵdaılar — múldem jol berilmeıtin is-áreketter. Azamattardyń senimin jáne polıtsııa abyroıyn túsiretin qyzmetkerlerge ishki ister organdarynda oryn joq jáne bolmaıdy, — dep habarlady vedomstvonyń baspasóz qyzmeti.

Sonymen qatar oqıǵa ornynda bolǵan taǵy eki polıtsııa qyzmetkeri men olardyń basshylyǵyna qatysty sheshim tekserý tolyq aıaqtalǵannan keıin qabyldanady.

Eske salaıyq, buǵan deıin Abaı oblysynda qyzmetkerlerin rogatkamen atqan polıtsııa bastyǵy jumystan qýylǵanyn habarlaǵanbyz.