Almaty oblysynda «Qazaqstan Barysy» júldegeri Quryltaı saılaýynda óz tańdaýyn jasady
QONAEV. KAZINFORM — Belgili qazaq palýany Rýslan Ábdirazaqov Quryltaı depýtattaryn saılaý aıasynda daýys berdi.
Ol óz tańdaýyn Qonaev qalasyndaǵy saılaý ýchaskeleriniń birinde jasady. Respýblıkalyq jáne halyqaralyq jarystarda qazaq kúresiniń namysyn qorǵap júrgen sportshy úshin eldiń qoǵamdyq ómirine qatysý mańyzdy.
— Búgin saılaý ýchaskesine keldim. Óıtkeni saılaýǵa qatysý ár azamattyń mańyzdy boryshy dep esepteımin. Bizdiń tańdaýymyz eldiń bolashaǵyna, balalarymyzdyń qandaı ortada ómir súrip, ósetinine áser etedi. Sportshy retinde óz tańdaýym men onyń nátıjesine jaýapkershilikpen qaraýǵa daǵdylanǵanmyn. Ómirde de osy qaǵıdany ustanyp, el úshin mańyzdy oqıǵalardan shet qalmaı, belsendi qatysý qajet dep oılaımyn, — dedi Rýslan Ábdirazaqov.
Búginde sportshy qazaq sportyndaǵy tanymal tulǵalardyń biri ári jas urpaqqa úlgi bolyp keledi. Onyń jetistikteri kúndelikti eńbek, tártip, qarsylasqa qurmet jáne maqsatqa degen jaýapkershiliktiń nátıjesi ekenin anyq.
Rýslan Ábdirazakov ulttyq kúres jankúıerlerine jaqsy tanys. Onyń sporttaǵy joly eldegi eń bedeldi jarystardyń biri — «Qazaqstan Barysymen» tyǵyz baılanysty. Palýan bul dodada birneshe ret úzdikter qatarynan kórindi. 2014 jyly týrnırdiń qola júldesin ıelense, 2015 jyly kúmis júldeger atandy. 2017 jyly «Almaty Barysy» týrnırinde jeńimpaz boldy. 2019 jyly sportshy «Qazaqstan Barysy» týrnırinde taǵy da júldege iligip, qola medaldi jeńip aldy. Úshinshi oryn úshin bolǵan sheshýshi beldesýde Aıbat Seıtendi utty. Sporttaǵy jolynda ol kúsh, tózimdilik, tártip jáne naqty nátıjege umtylysty basty qaǵıda etti. Osy qasıetter onyń sporttaǵy jetistikterinen ǵana emes, azamattyq ustanymynan da kórinis tabady.
