Almaty oblysynda qaıtys bolǵan donor 4 adamnyń ómirin saqtap qaldy
ALMATY. KAZINFORM – Almatydaǵy Kardıologııa jáne ishki aýrýlar ǵylymı-zertteý ınstıtýtynda donorlyq júrek transplantatsııasy sátti ótti. 6 saǵatqa sozylǵan kúrdeli operatsııa belgili kardıohırýrg ıÝrıı Pıanyń jetekshiligimen jasaldy.

Dárigerlerdiń aıtýynsha, donordyń júregin salǵan 43 jastaǵy patsıenttiń jaǵdaıy qazir turaqty. Naýqas bir jarym jyldan beri júrek jetispeýshiligi dıagnozymen esepte turdy. Energetıkalyq sýsyndardy shamadan tys tutynýdyń kesirinen jaǵdaıy nasharlaǵan patsıent, tipti dári-dármek qabyldaı almaıtyn hálge túsken.
– Meni osy halge túsirgen energetıkalyq sýsyn. Ony kóp ishetinmin. 1,5 jyl boıy sonyń saldaryn tarttym. Jastarǵa aıtatynym: qara sý ishseńder de energetık ishpeńder. Kúniye 3-4 bótelke ishetinmin. Maǵan ekinshi ómir syılaǵan donordyń týystary men dárigerlerge alǵys aıtamyn, - deıdi Dáýren Atambekov.

Dárigerlerdiń aıtýynsha, naýqas aýrýhanada taǵy bir apta jatqan soń ońaltý bólimine aýystyrylady.
– Júrekti transplantatsııalaý-kúrdeli operatsııalardyń biri, alaıda bizdiń alǵan tájirıbemiz, daǵdylarymyz, klınıkamyzdyń tehnıkalyq jaraqtandyrylýy olardy joǵary deńgeıde oryndaýǵa múmkindik beredi, - dedi Instıtýttyń kardıohırýrgııa bólimshesiniń meńgerýshisi Rústem Tóleýtaev.

Bul – júrek transplantatsııasy boıynsha Almatydaǵy ekinshi sátti operatsııa. Instıtýt dárigerleri 2023 jyly 19 jastaǵy jigitke donor júregin salǵan edi.
Aıta ketý kerek, donordan eki búırek, ókpe, sonymen qatar kóz qabyǵy alyndy. Búırek Jetisý oblysynyń turǵyny 17 jastaǵy naýqasqa A. Syzǵanov atyndaǵy ulttyq hırýrgııa ǵylymı ortalyǵynda jáne astanalyq 18 jastaǵy patsıentke University Medical Center-de transplantatsııalandy. Ókpe UMC-te qostanaılyq 43 jastaǵy patsıentke, kóz qabyǵy keratoplastıkasy eki retsıpıentke transplantatsııalandy.
Qazir Qazaqstanda júrek transplantatsııasyn kútý paraǵynda 140 eresek adam jáne 5 bala tur.