Almaty oblysynda qaıtarylǵan aktıvter esebinen jańa sport kesheni salynady
ASTANA. KAZINFORM — Úkimet Almaty oblysy Kegen aýdanynyń Jalaǵash aýylynda sport keshenin salýǵa 1,1 mlrd teńge bóldi.
Joba «Zańsyz ıemdenilgen aktıvterdi memleketke qaıtarý týraly» Zań sheńberinde iske asyrylýda. Prezıdenttiń tapsyrmasy boıynsha Arnaýly memlekettik qordaǵy qarajat óńirlerdegi áleýmettik mańyzy bar nysandardyń qurylysyna baǵyttalady.
Sport kesheni jalpy dene shynyqtyrý daıyndyǵy boıynsha oqý-jattyǵý sabaqtaryna jáne jarystar ótkizýge arnalǵan. Jobada boks, kúres jáne basqa da sport túrimen aınalysýǵa arnalǵan birneshe zal qarastyrylǵan.
2024 jyly Qazaqstanda barlyǵy 90 dene shynyqtyrý-saýyqtyrý kesheni salyndy, olardyń basym bóligi aýyldyq jerlerde. Budan basqa, Úkimet 2025 jyldyń sońyna deıin sporttyq ınfraqurylymǵa aýqymdy túgendeý baǵdarlamasyn iske asyrýda: 113 jańa nysan salý jáne jumys istep turǵan 26 sport mekemesin rekonstrýktsııalaý josparlanýda.
Búgingi tańda Úkimet Arnaýly memlekettik qordan áleýmettik mańyzy bar nysandardy salýǵa shamamen 50,6 mlrd teńge bóldi. Olardyń qatarynda 4 mektep, onyń ishinde bireýi mýzykalyq mektep, sport kesheni, kópsalaly aýrýhana kesheni, jataqhana, 2 balabaqsha bar.
«Zańsyz ıemdenilgen aktıvterdi memleketke qaıtarý týraly» Zań sýbektileriniń qarajaty esebinen Arqalyq, Astana, Almaty qalalarynda birqatar áleýmettik ınfraqurylym nysandarynyń qurylysy júrgizilýde.
Aıta keteıik, zańsyz ıemdenilgen aktıvterden qaıtarylǵan qarjyǵa 92 myń oryndyq 83 mektep salynady.