Almaty oblysynda qaýipti hımııalyq synapty 100 mln teńgege satpaq bolǵan azamat ustaldy
ALMATY. KAZINFORM – Almaty oblysynda zańsyz is-áreketterdiń joly kesildi.
Almaty oblysy Polıtsııa departamentiniń Uıymdasqan qylmysqa qarsy kúres basqarmasynyń qyzmetkerleri qaýipti hımııalyq zat – synapty zańsyz satý deregin toqtatqan.
– Jedel-izdestirý is-sharalary oblystyq prokýratýranyń úılestirýimen jáne Almaty oblysy boıynsha UQKD-men birlesip júrgizildi. Arnaıy operatsııa barysynda zatty 100 mıllıon teńgege satý kezinde Túrkistan oblysynyń 28 jastaǵy turǵyny ustalyp, ýaqytsha ustaý ızolıatoryna qamaldy, - dep habarlady Almaty oblysy polıtsııa departamentiniń bastyǵy Meıram Ábikeev.
Mámile jasalǵan jerde jalpy salmaǵy 3 keliden asatyn shyny kolbadaǵy «metall synap» zaty tárkilengen. Qazirgi ýaqytta oqıǵanyń barlyq mán-jaıyn jan-jaqty ári obektıvti anyqtaýǵa baǵyttalǵan qajetti tergeý áreketteri júrgizilip jatyr.
– Synap – asa ýly, joǵary ýytty hımııalyq element jáne adam ómiri men densaýlyǵyna eleýli qaýip tóndiredi. Onyń býlary aýyr ýlanýǵa, júıke júıesiniń zaqymdanýyna ákelýi múmkin, sondaı-aq aǵzada jáne qorshaǵan ortada jınalyp, uzaq merzimdi zııan keltiredi, - dep túsindirdi polıtsııadan.
Eske salaıyq, buǵan deıin SMS-blaster arqyly alaıaqtyq jasaǵan qylmystyq top ustaldy.
