Almaty oblysynda kásipkerdiń keńsesin tonaǵan qylmystyq top ustaldy

QONAEV. KAZINFORM – Almaty oblysy Talǵar aýdanynda jeke kásiporyn keńsesine jasalǵan iri urlyq áshkerelendi. 

Oblystyq polıtsııa departamentiniń málimetinshe, kásipkerden belgisiz tulǵalardyń keńseniń esigin buzyp, iri mólsherdegi aqshany urlap ketkeni jóninde aryz túsken. 

Aldyn ala derekter boıynsha, 23 qyrkúıek kúni keshki ýaqytta qaskúnemder Jalǵanmys aýylynda ornalasqan ǵımaratqa zańsyz kirip, 55 mıllıon teńge kólemindegi aqshany urlap ketken. 

– Beınebaqylaý jazbalaryn qaraý kezinde qylmystyń aldyn ala josparlanǵany anyqtaldy. Betine maska taǵyp, qolǵap kıgen belgisiz er adam ǵımaratqa kirip, ekinshi qabattaǵy esikti buzyp, ústel astynda turǵan qara tústi jol sómkesin alyp, ishindegi aqshanyń bir bóligin ózimen birge ákelgen rıýkzakqa salǵan. Keıin sómke men rıýkzakty qorshaýdan asyryp laqtyryp, ózi de syrtqa shyǵyp ketken, - dep habarlady departamentten. 

Jedel-izdestirý is-sharalarynyń nátıjesinde 39, 37 jáne 36 jastaǵy Almaty oblysynyń turǵyndary ustalǵan. Tintý barysynda kúdiktilerdiń úılerinen aqsha men tergeýge mańyzdy zattaı aıǵaqtar tárkilengen.

– Atalǵan derek boıynsha «urlyq» faktisimen qylmystyq is qozǵaldy. Qazirgi ýaqytta oqıǵanyń mán-jaıyn tolyq jáne obektıvti anyqtaýǵa baǵyttalǵan tergeý amaldary júrgizilýde. Quryqtalǵan kúdiktiler qamaýǵa alyndy, - dep málimdedi polıtsııa.

Eske salaıyq, buǵan deıin Almatyda kásipkerdiń úıin tonaǵan qaraqshylar toby ustalǵanyn jazǵanbyz.