Almaty oblysynda qarjy pıramıdalarynan 12 myń adam zardap shekken
QONAEV. KAZINFORM – Bul týraly Almaty oblysy boıynsha ekonomıkalyq tergep-tekserý departamenti basshysynyń orynbasary Baqtııar Júzenov aıtty.
Ol Almaty oblysynyń óńirlik kommýnıkatsııalar qyzmetiniń alańynda qarjy pıramıdalarynyń aldyn alý boıynsha departamenttiń jumys nátıjelerimen bólisti.
Aıtýynsha, 2024-2025 jyldary qarjy pıramıdasyn uıymdastyrýshylar men jarnamalaýshylarǵa qatysty 23 sotqa deıingi tergep-tekserý júrgizilgen. Onyń nátıjesinde Amanat Hoým, Amanat Draıv, Asar baspana, FS, AIF, HRT, Charhomi qarjy pıramıdalarynyń joly kesilgen.
- Qarjy pıramıdasynyń salymshylary retinde tartylǵan azamattar sany 12 myńnan assa, olardan jınalǵan somma 58 mlrd teńgeden asqan. Jábirlenýshilerge keltirilgen shyǵyndy óteý maqsatynda jyljymaıtyn múlik pen avtokólikterdi qosa alǵanda 23,1 mlrd teńgelik múlik tárkilendi, - dedi ol.
Baqtııar Júzenov qylmystyq jolmen túsken kiristerdi jasyrý maqsatynda salymdary krıptovalıýtamen jınaý jaǵdaılary jıilep ketkenin atap ótti.
- Qarjy pıramıdalaryna tán belgiler – eshqandaı táýekelsiz joǵary tabys týraly ýáde, naqty ónimniń nemese qyzmettiń joqtyǵy, jańa salymshylardy tartýǵa shaqyrý, salynǵan sommany qaıtarýdyń túsiniksiz sharttary jáne qarjylyq qyzmetti atqarýǵa lıtsenzııanyń joqtyǵy. Qarjy pıramıdalary kóbine áleýmettik jeliler, messendjerler jáne adamdardy tyńdata alatyn «kóshbasshylar» arqyly jumys júrgizedi, - dedi ol.
Sonymen qatar ol Ekonomıkalyq tergep-tekserý departamenti 2024-2025 jyldary qarjy pıramıdalarynyń belgileri bar 1800 saıttar men chattar buǵattaǵanyn aıtty.
- Qarjy pıramıdalarynyń qyzmeti jáne ekonomıkalyq quqyqbuzýshylyqtar jaıly barlyq aqparatty Qarjylyq monıtorıng agenttiginiń senim telefony 1458 nemese AFM Insider chat-botyna habarlaýlaryńyzdy suraımyz, - dedi Baqtııar Júzenov.
Eske salaıyq, buǵan deıin Almaty oblysynda «Amanat Drive» ataýymen qarjy pıramıdasynyń qyzmetin áshkerelengenin jazǵanbyz.