Almaty oblysynda qamys órtendi: úsh oshaq oqshaýlanyp, tórtinshisi sóndirilip jatyr
ASTANA. KAZINFORM — Almaty oblysynda órtti sóndirý jumystary jalǵasyp jatyr. Qazirgi ýaqytta tórt oshaqtyń úsheýi oqshaýlanǵan, al tórtinshi ýchaskede tilsiz jaýmen kúres kúsheıtilgen rejımde júrgizilip jatyr. Bul týraly TJM málim etti.
Almaty oblysy Eńbekshiqazaq aýdany Nurly aýylynan shamamen 20 shaqyrym jerde, Іle ózeniniń mańynda ashyq aýmaqta qurǵaq shóp pen qamys órtenip jatyr. Órtti sóndirý jumystary batpaqty ári jetýi qıyn jer bederine baılanysty kúrdelene túsken.
Oqıǵa ornynda TJM qyzmetkerleri, Shelek orman sharýashylyǵynyń mamandary jáne «Qazavıaqutqarý» AQ tikushaǵynyń ekıpajy jumys istep jatyr. Órtti sóndirýge barlyǵy 70-ke jýyq adam, 21 tehnıka jáne «Qazavıaqutqarý» AQ tikushaǵy jumyldyryldy. Órtti sóndirý jumystary jalǵasýda. Oqıǵa ornynda jedel shtab uıymdastyryldy. Jaǵdaı QR TJM baqylaýynda.
Qazirgi ýaqytta órtti sóndirý jumystaryn Almaty oblysy TJD bastyǵy úılestirýde.
Qazirgi jaǵdaı boıynsha órttiń tórt oshaǵynyń úsheýi oqshaýlandy. Tórtinshi ýchaskede órtti sóndirý jumystary kúsheıtilgen rejımde jalǵasyp jatyr.
Jumystar órt oshaǵyna aparatyn kirme joldardyń bolmaýyna baılanysty kúrdelenýde. Órt sóndirý jáne aýyr tehnıkanyń ótýin qamtamasyz etý úshin kirme jol salý jumystary júrgizilip jatyr.
