Almaty oblysynda kafe órtenip, 5 gaz ballony qaýipsiz jerge shyǵaryldy
ASTANA. KAZINFORM – Almaty oblysynyń Talǵar aýdanynda órt sóndirýshiler kafege japsarlas ornalasqan káýaphanadan shyqqan órtti der kezinde sóndirip, bes gaz ballonynyń jarylýyna jol bermedi.
Tótenshe jaǵdaılar mınıstrliginiń málimetinshe, oqıǵa Kendala aýylynda bolǵan. 112 pýltine kafege japsarlas salynǵan káýaphananyń órtengeni týraly habarlama túskennen keıin oqıǵa ornyna qutqarýshylar jedel jiberilgen.
«Órt sóndirýshilerdiń jedel áreketteriniń arqasynda jalynnyń kafe ǵımaratyna taralýyna jol berilmedi. Órtti sóndirý barysynda qaýipti aımaqtan bes gaz ballony shyǵarylyp, olardyń jarylýynyń aldyn aldyq», – dep habarlady TJM.
Qutqarýshylar 50 sharshy metr aýmaqty sharpyǵan órtti 22 mınýt ishinde tolyq sóndirdi.
Oqıǵa saldarynan zardap shekkender joq. Qazirgi ýaqytta órttiń shyǵý sebebi anyqtalyp jatyr.
Aıta keteıik, Pavlodarda órtenip jatqan úıdiń terezesinen sekirgen qyz kóz jumdy.
