Almaty oblysynda qabyrǵasyna jaryq túsken mektepte balalar oqyp júr

QONAEV. KAZINFORM — Almaty oblysy Jambyl aýdany Eńbekshiaral aýylyndaǵy mekteptiń qabyrǵalary jarylyp ketken.

Onyń vıdeosy áleýmettik jelide tarady. Beınejazbadan irgetasy sógilip, qabyrǵalary jarylǵan mektepti kórýge bolady.

«Bul mektepte balalar qalaı oqıdy? Mekteptiń qabyrǵalary qulaıyn dep tur. Bul jerde myńnan astam bala bilim alady. Olardyń ómiri ne bolmaq», – dep jazdy jeli qoldanýshysy.

Atalǵan jaǵdaıǵa qatysty Almaty oblysynyń ákimdigi túsinik berdi.

«Seısmıkalyq belsendiliktiń saldarynan 2024 jyldyń aqpanynda oblystyń segiz mektebi men bir kolledjinde ártúrli aýyrlyq dárejesindegi zaqym keldi. Sonyń ishinde qabyrǵadaǵy jaryqtar men irgetastyń ishinara buzylýy tirkeldi. Olar: Іle aýdany Túımebaev aýylynda №20, Boraldaı aýylynda №40 orta mektep, Eńbekshiqazaq aýdany, Qaıpov aýylyndaǵy Qazaqstan orta mektebi, Jambyl aýdanyndaǵy Eńbekshiaral orta mektebi, Qaınazar aýylyndaǵy №2 orta mektebi, Uıǵyr aýdany Hamraev atyndaǵy, Shyryn, Dardamty orta mektepteri, Shonjy polıtehnıkalyq kolledjiniń sheberhanasy», – dep habarlady Almaty oblysynyń ákimdiginiń baspasóz qyzmeti.

Ákimdiktiń baspasóz qyzmetiniń málimetinshe, jóndeý jumystary júrgiziledi. Qarjy tótenshe jaǵdaılarǵa arnalǵan rezerv qarajatynan bólinedi.

«Qazir barlyq zardap shekken bilim berý obektileri úshin tehnıkalyq qorytyndylar men jobalaý-smetalyq qujattamalar daıyndalyp jatyr. Olardyń negizinde kúrdeli jóndeý júrgiziletin bolady. Jóndeý jumystaryn qarjylandyrý tótenshe jaǵdaılarǵa arnalǵan rezerv qarajaty esebinen júzege asyrylady», – dep atap ótti ákimdikten.