Almaty oblysynda ınvestorlardyń jumysyna kedergi keltirgen 18 sheneýnik jazalandy
ALMATY. KAZINFORM - Almaty oblysynyń prokýratýrasy ınvestıtsııalyq jobalardy turaqty túrde súıemeldep, ınvestorlardyń quqyǵyn qorǵaýdy qamtamasyz etip keledi. Bıyl alty aıda prokýrorlar jalpy quny 1,2 trln teńgeni quraıtyn 20 myńnan astam jańa jumys ornyn qurýdy kózdeıtin jobalardy júzege asyryp jatqan 28 ınvestordyń 30 problemalyq máselesin sheshti.
Almatyq oblystyq prokýratýrasy baspasóz qyzmetiniń habarlaýynsha, prokýrorlyq súıemeldeý aıasynda baqylaý-qadaǵalaý organdary júrgizgen 6 zańsyz tekserý men salynǵan 3 ákimshilik aıyppuldyń kúshi joıyldy. Sonymen qatar ınvestorlarǵa 4 jer ýchaskesi berilip, elektr jelilerine qosylýǵa 2 tehnıkalyq sharttyń rásimdelýi qamtamasyz etildi.
Investorlarǵa ákimshilik kedergi keltirgeni úshin 8 laýazymdy tulǵa tártiptik jaýapkershilikke, 10 laýazymdy tulǵa ákimshilik jaýaptylyqqa tartyldy.
Prokýratýranyń qabyldaǵan sharalarynyń nátıjesinde 100-ge jýyq ınvestor Ulttyq tsıfrlyq ınvestıtsııalyq platformaǵa engizildi. Bul olarǵa prokýrorlyq qorǵaý tetikterin, onyń ishinde «prokýrorlyq súzgini» qoldanýǵa múmkindik beredi.
-Esepti kezeńde prokýratýra ınvestorlarǵa qatysty 3 tekserýdi, 10 ákimshilik hattamany jáne 11 shekteý sıpatyndaǵy sharany kelisýden bas tartty. Sonymen qatar memlekettik organdar prokýrormen kelisilmeı sotqa berilgen 2 talap-aryzdy keri qaıtaryp aldy,-delingen habarlamada.
Osy baǵyttaǵy jumys jalǵasýda.
Osyǵan deıin Shymkentte ınvestordyń quqyǵyn buzǵan laýazymdy tulǵalar jaýapqa tartylǵany týraly jazdyq.
