Almaty oblysynda ınvestor zańsyz tekserýge ushyraǵan

ASTANA. KAZINFORM - Investor «STK Sokol» JShS-yna baqylaýshy organ zańsyz tekserý jasaǵan jáne shekteý sharalaryn qoldanǵan, dep habarlaıdy Almaty oblysynyń prokýratýrasy. 

Búgingi tańda ınvestor sport-tehnıkalyq salany damytýǵa baǵyttalǵan jobaǵa 20 mlrd teńgeden astam qarjy salǵan.

Kásipkerlik kodekstiń talaptaryn buza otyryp, Almaty oblysynyń Jer resýrstaryn basqarý departamentiniń qyzmetkeri quqyqtyq statıstıka jáne arnaıy esepke alý organdarynda tekserýdi taǵaıyndaý týraly akti tirkelmeı, JShS qyzmetine tekserý júrgizgen.

Tekserý qorytyndysy boıynsha aýdany 100 ga jer ýchaskesine aýyrtpalyq salynǵan.

Qadaǵalaý aktisi boıynsha tekserý zańsyz dep tanylyp, jer ýchaskesine salynǵan shekteý sıpatyndaǵy aýyrtpalyq alynyp tastaldy.

Oblys prokýratýrasynyń qaýlysymen zańsyz tekserýdi júzege asyrǵan qyzmetker QR ÁQBtK-niń 175-baby boıynsha ákimshilik jaýaptylyqqa tartyldy (jeke kásipkerlik sýbektilerine tekserý júrgizý tártibin buzý).

Bıznes pen ınvestorlardyń quqyqtary men zańdy múddelerin qorǵaý jumystary jalǵasýda jáne oblys prokýratýrasynyń erekshe baqylaýynda.