Almaty oblysynda ınternet-alaıaqtyq qurbandaryna 18 mln teńge qaıtaryldy

QONAEV. KAZINFORM – Almaty oblysy polıtsııa departamentiniń Kıberqylmysqa qarsy is-qımyl basqarmasynyń aǵa jedel ýákili Álibek Kerim 2025 jyly atqarylǵan jumystar týraly aıtty.

Onyń sózinshe, óńirde 2024 jyly 1470 alaıaqtyq deregi tirkelse, 2025 jyly olardyń sany 1711-ge jetken. Jalpy alaıaqtyq qylmystary 16,4 paıyzǵa ósken.

Degenmen, Álibek Kerim oblysta ınternet-alaıaqtyq qylmystarynyń sany tómendegenin atap ótti.

- 2024 jyly óńirde 75 ınternet-alaıaqtyq deregi tirkelse, 2025 jyly bul kórsetkish 35-ke deıin qysqardy. Bul júrgizilip jatqan aldyn alý sharalarynyń oń nátıjesin kórsetedi, - dedi ol.

Polıtsııanyń jedel ýákili alaıaqtar qoldanatyn jıi ádisterdiń qatarynda sms-kod suratý, jalǵan ınvestıtsııalyq jobalar arqyly tabys ýáde etý, shyn máninde jumys istemeıtin ınternet-dúkender, sondaı-aq deldaldyq sıpattaǵy «droperlik» shemalar bar ekenin aıtty.

– Júrgizilgen aldyn alý sharalarynyń nátıjesinde 2025 jyly ınternet-alaıaqtyqqa qatysty 39 mıllıon 680 myń teńge kúdikti esepshottardan ýaqytyly buǵattaldy. Onyń ishinde 18 mıllıon 269 myń teńge zardap shekken azamattarǵa keri qaıtaryldy. Sonymen qatar 3750 jalǵan saıttyń qyzmeti toqtatyldy, – dedi Álibek Kerim.

Eske salaıyq, buǵan deıin WhatsApp-ta kıberalaıaqtyqtyń jańa túri paıda bolǵanyn jazǵanbyz.