Almaty oblysynda ıesiz janýarlar panajaıynyń negizin qalaýshy kisi qolynan qaza tapty
QONAEV. KAZINFORM — Almaty oblysynda «Dog House — Tvardovskıı dom» ıesiz janýarlar panajaıynyń negizin qalaýshy Vladımır Teplıakov mert boldy.
Polıtsııa málimetinshe, 7 qazanda «Adam óltirý» boıynsha qylmystyq is qozǵaldy. Qazir qylmysqa qatysy bar adamdardy anyqtap, ustaýǵa baǵyttalǵan tergeý jáne jedel-izdestirý sharalary júrgizilip jatyr.
— Qazir oqıǵanyń barlyq mán-jaıy anyqtalyp jatyr. Tergeý jalǵasyp jatyr. Tergeý barysy Almaty oblysy polıtsııa departamenti basshylyǵynyń baqylaýynda. Qazaqstan Respýblıkasy Qylmystyq-protsestik kodeksiniń 201-babyna sáıkes, ózge aqparat jarııa etýge jatpaıdy, — dep habarlady polıtsııa departamentiniń baspasóz qyzmeti.
Vladımır Teplıakovtyń mert bolǵanyn erikti Arsen Qabdenov te áleýmettik jelide habarlady. Onyń aıtýynsha, panajaıdyń negizin qalaýshy qaza bolǵannan keıin shamamen 90 ıt ıesiz qalǵan. Qazir eriktiler janýarlarǵa jańa ıeler izdep jatyr.
Arsen Qabdenovtiń sózinshe, Vladımır Teplıakov panajaıdy 2015 jyly qurǵan. Oǵan marqum ulynyń esimin bergen. Janýarlar panajaıy jumys istegen jyldary birneshe ret basqa jerge kóshýge májbúr bolyp, túrli qıyndyqqa tap bolǵan.
Eske salaıyq, buǵan deıin Almatyda taýdan denesi tabylǵan polıtseıdiń ólimine qatysty tergeý aıaqtalǵanyn jazǵan edik.
