Almaty oblysynda hırýrgtar naýqastyń birneshe tustan synǵan bet súıegin qalpyna keltirdi
ALMATY. KAZINFORM – Almaty oblysynda dárigerler bet-súıek qańqasy jaraqattanǵan patsıentke shuǵyl túrde medıtsınalyq kómek kórsetti.
Almaty kópsalaly klınıkalyq aýrýhanasynyń málimetinshe, belgisiz tulǵalardyń zańsyz áreketinen zardap shekken azamat statsıonarǵa shuǵyl túrde jetkizilgen. Patsıenttiń jaǵdaıy aýyr dep baǵalandy.
Tekserýden keıin ol jansaqtaý bólimine jatqyzyldy. Dárigerler oǵan bet-súıek qańqasynyń Le For I jáne II tıpi boıynsha kóptegen synyqtary, bet-urt kesheniniń eki jaqty zaqymdanýy, muryn súıekteri men perdesiniń, sondaı-aq kóz uıasy qabyrǵalary men joǵarǵy jaq súıek qýystarynyń synýy degen dıagnoz qoıdy. Kompıýterlik tomografııa súıek synyqtary men kóptegen jaraqattardy rastady.
- Bet-súıek qańqasyna ashyq repozıtsııa jáne osteosıntez júrgizildi. Hırýrgtar joǵarǵy jaq súıegi men bet-urt kesheni elementteriniń anatomııalyq ornyn qalpyna keltirdi. Hırýrgııalyq aralasý súıek qurylymdaryn bekitýge, ómirlik mańyzdy fýnktsııalardy qalpyna keltirýge jáne yqtımal asqynýlardyń qaýpin azaıtýǵa múmkindik berdi, – dep habarlady aýrýhanadan.
Qazirgi ýaqytta patsent mamandardyń turaqty baqylaýynda. Jaǵdaıy turaqty dep baǵalanǵan, terapııa josparly rejımde jalǵasyp jatyr.
Eske salaıyq, Atyraýda alǵash ret er adamnan mıkro-TESE operatsııasy arqyly uryq alyndy.