Almaty oblysynda gaz kompanııasy qyzmetkerleri 168 mln teńge jymqyryp qalǵan
ASTANA. KAZINFORM — QMA Almaty oblysy boıynsha departamenti «Almatygazservıs-Holdıng» AQ-nyń qarjysyn jymqyrý faktisi boıynsha tergeýdi aıaqtady.
Atalǵan aktsıonerlik qoǵam óńirge tabıǵı gaz jetkizýmen aınalysady.
— Tergeý materıaldaryna saı kompanııa qyzmetkerleri eseptegish qurylǵylardyń kórsetkishterin tirkep, tutynýshylardan qolma-qol aqsha jınaýmen aınalysqan. Jınalǵan qarajatty olar materıaldyq jaýapty tulǵalarǵa tapsyrǵan.
Alaıda atalǵan jaýapty tulǵalar jınalǵan qarajatty zańdy túrde ótkizýdiń ornyna óz paıdalaryna jaratyp, tólem týraly aqparatty «SymphonyGAS» júıesinde jasyryp kelgen, — delingen Qarjylyq monıtorıng agenttigi habarlamasynda.
Osylaısha, kompanııanyń dırektory, onyń orynbasary, aǵa operator jáne aǵa baqylaýshydan turatyn tulǵalar toby eki jyl ishinde tutynýshylar tólegen 168 mıllıon teńgeni ıemdengen.
Sot sanktsııasymen kúdiktilerdiń jalpy quny 165 mıllıon teńge bolatyn múlkine (turǵyn úı, páter jáne avtokólik) tyıym salyndy.
Qylmystyq-protsestik kodeksiniń 201-babyna sáıkes, ózge aqparat jarııa etilmeıdi.
Aıta ketelik Prezıdent Qarjylyq monıtorıng agenttiginiń ókilettigin keńeıtken edi.