Almaty oblysynda FIFA standarty boıynsha fýtbol akademııasy salynady

QONAEV. KAZINFORM – Talǵarda halyqaralyq FIFA standarttaryna saı keletin zamanaýı fýtbol akademııasynyń irgetasy qalandy. 

Qazaqstan fýtbol federatsııasynyń málimetinshe, joba jeke ınvestorlardyń qarajaty esebinen júzege asyrylady.

QFF prezıdenti Marat Omarovtyń aıtýynsha, akademııada jas fýtbolshylarǵa júıeli túrde zamanaýı fýtbol talaptaryna saı daıyndalýǵa barlyq jaǵdaı jasalady. Joba – balalar men jasóspirimder sportyn damytýdaǵy mańyzdy qadam.

– Іrgetasy qalanǵan fýtbol akademııasy – Qazaqstan fýtbol federatsııasynyń aýqymdy jáne strategııalyq mańyzy zor alǵashqy jobasy. Ol elimizdegi jas fýtbolshylardy daıarlaý júıesin ózgertip, jańa kózqaraspen qaraýǵa múmkindik beredi, - dedi QFF prezıdenti Marat Omarov.

Akademııanyń jalpy aýmaǵy – 5 520 sharshy metr. Ol úsh negizgi bloktan turady: sporttyq, ákimshilik-turmystyq jáne jataqhana. 

Qazaqstan fýtbol federatsııasynan atap ótkendeı, akademııanyń qurylysy – kezekti sporttyq joba ǵana emes. Bul – adamı kapıtalǵa, balalardyń bolashaǵy men sport áleýetin arttyrýǵa baǵyttalǵan uzaqmerzimdi ınvestıtsııa. 

Munda jas talanttardy anyqtap, olardy damytýǵa júıeli negiz qalyptastyryp, kásibı daıyndyqpen qatar, onda turýǵa, bilim alýǵa jáne fýtbol qaýymdastyǵyna beıimdelýge qajetti jaǵdaı jasalady. 

Buǵan deıin Týrızm jáne sport mınıstrligi bir balalar fýtbol alańyn salýǵa qansha qarjy kerek ekenin aıtqan bolatyn. 

Memleket basshysy Qasym-Jomart Toqaev Ulttyq quryltaıdyń tórtinshi otyrysynda aldaǵy eki jylda árbir oblys, aýdan ortalyǵynda, kent pen aýylda balalarǵa arnalǵan fýtbol alańy bolýǵa tıis ekenin tapsyrǵan edi.