Almaty oblysynda esirtki zerthanasynan 55 keli mefedron tárkilendi
Іshki ister mınıstrliginiń esirtki qylmysyna qarsy is-qımyl departamentiniń qyzmetkerleri aýmaqtyq bólimshelermen birlesip «Quqyqtyq tártip» respýblıkalyq operatsııasyn júrgizý kezinde esirtkiniń iri partııalaryn tárkiledi. Kazinform bul týraly Polisia.kz-ke silteme jasap habarlaıdy.
Almaty oblysynda Almaty qalasynyń eki turǵyny ustaldy. Olar jeke úıdiń aýmaǵynda sıntetıkalyq esirtki óndiretin esirtki zerthanasyn uıymdastyrdy.
Úı-jaılardy tintý kezinde 3 tonna prekýrsor (esirtki óndirý jáne daıyndaý kezinde paıdalanylatyn zattar), zerthanalyq qural-jabdyq (reaktor, shyny kolbalar) jáne 55 keli mefedron psıhotroptyq zatynyń daıyn ónimi tárkilendi.
Semeı polıtseıleri Almaty qalasynyń, Abaı jáne Almaty oblystarynyń aýmaǵynda esirtkini ótkizý boıynsha ınternet-dúken uıymdastyrǵan Almaty qalasynda turatyn 4 turǵynǵa qatysty uzaq merzimdi tekserý operatsııasyn aıaqtady. Іs-shara bir mezgilde Almaty jáne Semeı qalalarynda júrgizildi.
Tintý barysynda 8 esirtkini býyp-túıý materıaldary, aqshalaı qarajattar men noýtbýkter tárkilendi. Júrgizilgen operatsııanyń qorytyndysy boıynsha ınternet-dúkenniń qyzmeti toqtatyldy. Kúdiktiler ustaldy.
Qaraǵandy oblysyndaǵy qylmystyq-atqarý júıesi mekemeleriniń birinde jedel-izdestirý is-sharalaryn júrgizý kezinde sottalǵandarǵa sálemdemeler arqyly esirtki zattaryn jetkizý arnasy joıyldy.
Jambyl oblysynyń polıtseıleri Taraz qalasynda uzaq ýaqyt boıy iri kólemde geroın jetkizýmen jáne ótkizýmen aınalysqan 63 jastaǵy turǵyndy ustady.
Jedel-profılaktıkalyq is-sharanyń 10 kúninde polıtsııa zańsyz aınalymnan 337 keli túrli esirtki, onyń ishinde 87 keli sıntetıkalyq esirtki jáne 7 myńnan astam tramadol dárilik preparattyń tabletkasy tárkilendi.
