Almaty oblysynda er adamdy óltirgen eki kúdikti qamaýǵa alyndy
QONAEV. KAZINFORM – Almaty oblysynyń Uıǵyr aýdanynda joǵalyp ketken 29 jastaǵy er adamnyń ólimine qatysty eki adam ustaldy. Bul týraly Almaty oblysy polıtsııa departamentiniń baspasóz qyzmeti málimdedi.
Vedomstvonyń málimetinshe, 27 mamyr kúni aýdandyq polıtsııaǵa áıel adam habarlasyp, jumysqa ketken ulynyń baılanysqa shyqpaı qalǵanyn aıtqan.
Osydan keıin tártip saqshylary jedel izdestirý jáne izdeý sharalaryn uıymdastyrdy. Joǵalǵan azamattyń máıiti onyń jumys ornyna jaqyn ornalasqan demalys aımaǵynyń mańynan tabyldy.
– Aldyn ala málimet boıynsha, er adam áriptesterimen birge spırttik ishimdik ishken. Keıin olardyń arasynda janjal shyǵyp, jábirlenýshi dene jaraqattaryn alǵan.
Atalǵan faktiler boıynsha kisi óltirý jáne qylmysty jasyrý baptarymen qylmystyq ister qozǵaldy, - delingen polıtsııa taratqan habarlamada.
Qazirgi ýaqytta eki kúdikti ustalyp, ýaqytsha ustaý ızolıatoryna qamaldy.
Polıtsııa tergeý barysynda oqıǵanyń barlyq mán-jaıyn anyqtaýǵa baǵyttalǵan qajetti protsessýaldyq áreketter júrgizilip jatqanyn habarlady. Al oqıǵa kezinde kúdiktilermen birge bolǵan úshinshi azamatqa qatysty protsessýaldyq sheshim tergeý nátıjesine qaraı qabyldanady.
Eske salaıyq, buǵan deıin Almaty oblysynda polıtsııa qyzmetkeri áıelin kólikpen qaǵyp óltirgenin jazǵanbyz.
