Almaty oblysynda eki sýdıa para aldy degen kúdikke ilindi

Almaty oblysy Talǵar aýdandyq sotynyń eki sýdıasy sybaılas jemqorlyqqa qatysy bar degen kúdikpen ustaldy, dep habarlaıdy Kazinform.

Redaktsııamyzǵa belgili bolǵandaı, osy jyldyń tamyz aıynda Talǵar aýdandyq sotynyń eki sýdıasyna qylmystyq is qozǵalǵan.

Olar elimizdiń kóshi-qon zańnamasyn buzǵan shetel azamatynan para aldy degen kúdikke ilindi.

Sýdıalardyń birine beımálim tulǵa ózine qatysty qozǵalǵan ákimshilik isti qaraǵanda elden shyǵaryp jibermeıtindeı, aıyppul túrinde jaza taǵaıyndaýǵa kómektesýin ótingen.

Osy sheshim úshin ol 30 myń teńge usynǵan.

Óz kezeginde sýdıa áriptesine júgingen. Qazirgi ýaqytta tergeý amaldary júrip jatyr. 

QR Sybaılas jemqorlyqqa qarsy is-qımyl agenttiginiń Almaty oblysy boıynsha departamenti bul aqparatty resmı rastamady, alaıda joqqa da shyǵarmady.

«Konstıtýtsııanyń 77-babynyń 3-tarmaǵynyń 1-tarmaqshasyna sáıkes «sýdıa sot tóreligin júzege asyrý kezinde táýelsiz jáne tek Konstıtýtsııaǵa ǵana baǵynady». Sondaı-aq zańǵa jáne Qylmystyq-protsestik kodeksiniń 19-babynyń 1-bóligi «kinásizdik prezýmptsııasy» boıynsha zańdy kúshine engen sot úkimimen qylmys jasaǵany úshin kináli dep tanylǵanǵa deıin ár adam kinásiz sanalady», - dep atap ótti Almaty oblysy boıynsha Antıkordyń baspasóz qyzmetinen.

Almaty oblystyq sotynyń baspasóz qyzmeti sýdıalar jumysta dep qysqa ǵana jaýap berdi.

Kazinform redaktsııasy QR Sybaılas jemqorlyqqa qarsy is-qımyl agenttigine resmı saýal joldady.