Almaty oblysynda eki kúnde 1 100-den astam zańsyz alkogol ónimi tárkilendi
ASTANA. KAZINFORM — Almaty oblysynda prokýratýranyń bastamasymen júrgizilgen reıdter barysynda eki kúnniń ishinde 1 100-den astam zańsyz alkogol ónimi tárkilenip, zańnama talaptaryn buzǵan birneshe saýda nysany jaýapqa tartyldy.
Almaty oblysynyń prokýratýrasy polıtsııa jáne memlekettik kirister organdarymen birlesip alkogol ónimderin zańsyz satýǵa qarsy reıdtik is-sharalardy jalǵastyryp jatyr.
10-11 shilde kúnderi ótken reıdterdiń qorytyndysynda alkogol ónimderin ótkizý kezinde zań talaptaryn buzýdyń jeti faktisi anyqtaldy. Sonymen qatar Qonaev qalasynyń jaǵalaý aımaǵyndaǵy demalys oryndarynda alkogoldi zańsyz satýdyń úsh deregi tirkelip, kináli tulǵalar ákimshilik jaýapkershilikke tartyldy.
Tekserý barysynda zańsyz aınalymnan 1 100-den astam alkogol ónimi tárkilendi. Sondaı-aq qoǵamdyq oryndarda alkogol ishýdiń 51 faktisi men kólikti mas kúıde basqarýdyń alty deregi anyqtaldy.
Reıd nátıjesinde alkogol ónimderin satýǵa berilgen lıtsenzııasynan 3 saýda nysany aıyryldy.
Prokýratýra málimetinshe, jyl basynan beri óńirde 60 reıd ótkizilip, onyń nátıjesinde 240 saýda nysany ákimshilik jaýapkershilikke tartylǵan. Onyń ishinde 14 nysan alkogol ónimderin satý lıtsenzııasynan aıyrylǵan.
Eske salaıyq, buǵan deıin Óskemende 1,3 tonnadan astam zańsyz alkogol tárkilengenin habarlaǵanbyz.
